БМТ атроф-муҳитни тиббий ниқоб ва қўлқоплар билан ифлослантириш даражаси ортганини маълум қилди

Коронавирус пандемияси атроф-муҳитни бир марта ишлатиладиган маҳсулотлар, шу жумладан, юз ниқоблари, ҳимоя қўлқоплари ва дезинфекция суюқликларининг идишлари билан ифлослантириш кескин ортишига олиб келди. Бу ҳақда Бирлашган Миллатлар Ташкилотининг Савдо ва ривожланиш бўйича конференцияси (ЮНКТАД) томонидан эълон қилинган ҳисоботига таяниб «РБК» хабар берди.

Мутахассисларнинг фикрига кўра, COVID-19 коронавирусининг пандемияси билан боғлиқ чекловчи чоралар кўрилиши натижасида иссиқхона газлари эмиссияси 5 фоизга камайган, аммо коронавирусга қарши қаратилган ҳамма чоралар ҳам атроф-муҳитга ижобий таъсир кўрсатмади.

«Бизнинг кўчаларимиз, пляжлар ва океанларимиз чиқиндиларнинг сунамисига, жумладан, пластик юз ниқоблари, қўлқоплар, дезинфекциялаш учун идишлар ва озиқ-овқат қадоқларига дуч келди», дейилади ҳисоботда.

ЮНКТАДнинг халқаро савдо департаменти директори Памела Кокс-Хемильтоннинг сўзларига кўра, коронавирус тарқалишидан олдин ҳам пластик ифлосланиш сайёра учун энг асосий таҳдидлардан бири бўлган.

«Одамларнинг хавфсизлигини сақлаш ва касалликнинг олдини олиш учун мўлжалланган кунлик фойдаланиладиган маҳсулотларга талаб тўсатдан ўсиши вазиятни янада ёмонлаштирди», — дейди Кокс-Хемильтон.

Grand View Research консалтинг компаниясининг ҳисоб-китобларига кўра, бир марталик ниқобларнинг глобал савдоси 800 миллион доллардан 166 миллиард долларга кўтарилди.

ЮНКТАД ҳисоб-китобларига кўра, пандемия натижасида ҳосил бўлган пластмассанинг тахминан 75 фоизи денгиз чиқиндиларига айланиши мумкин. Шу билан бирга, БМТнинг атроф-муҳитга тегишли дастурига кўра, пластик чиқиндиларнинг, хусусан, балиқчилик, сайёҳлик ва денгиз транспортига салбий таъсири йилига 40 миллиард долларни ташкил этади.

ЮНКТАД ҳукуматлардан пластмассадан фойдаланишни тугатиш ёки шиша, керамика, табиий толалар, қоғоз, картон, гуруч пўсти ва табиий каучук каби токсик бўлмаган ҳамда биологик парчаланадиган пластмасса ўрнини босувчи воситаларга ўтишни сўради.

«Ривожланаётган давлатлар кўплаб пластмасса ўрнини босадиган маҳсулотларнинг асосий етказиб берувчилари бўлганлиги сабабли, ортиб бораётган глобал талаб улар учун янги савдо ва инвестиция имкониятларини яратиши мумкин», — деди Коек-Хамильтон.

Унинг сўзларига кўра, кўплаб пластик ўрнини босувчи маҳсулотларнинг ишлаб чиқариш таркибидаги ўзгаришлар янги иш ўринларини яратиши мумкин.