КХДР етакчиси Ким Чен Иннинг маълум қилишича, ядро қуролининг борлиги Шимолий Кореянинг хавфсизлик кафолати ҳисобланади. У мазкур баёнотни 1950—1953 йиллардаги Корея урушининг якунланганига 67 йил тўлиши муносабати билан бўлиб ўтган фахрийлар учрашувида қилган. Бу ҳақда «РБК» хабар берди.
Шимолий Корея раҳбарининг сўзларига кўра, ХХ асрнинг ўртасидаги уруш такрорланмаслиги учун мамлакатга «мутлақ куч» керак. Шу сабабли КХДР ядро қуролини ривожлантириш йўлидан кетган.
«Бизнинг ишончи ярдо қуролимиз туфайли бу ерда бошқа уруш бўлмайди, мамлакатимизнинг хавфсизлиги ва келажаги эса абадий таъминланади», — дея маълум қилган Ким Чен Ин.
Унинг қайд этишича, ядро қуроли Шимолий Кореяни нафақат ҳарбий таҳдидлар ва душман кучларидан, балки ҳар қандай сиёсий босимдан ҳам ҳимоя қилади.
Шимолий Корея ядро қуроли яратиш жараёнини 1950 йилларнинг бошида бошлаган. Мамлакат 2005 йилда ядро қуролига эга эканлигини тан олган, мамлакатнинг биринчи ядро синови эса 2006 йилнинг кузида бўлиб ўтган.
Эслатиб ўтамиз, Шимолий ва Жанубий Корея муносабатлари июнь ойининг бошларида ёмонлашди. 14 июнь куни Жанубий Корея ҳукумати Шимолий Корея билан боғлиқ ҳар қандай вазият юзасидан жавоб беришга тайёрлигини таъкидлаб, КХДРни икки мамлакат ўртасидаги ҳарбий битим бўйича келишувларини амалга оширишга чақирди. 16 июнь куни эса Шимолий Корея ҳарбийлари Кэсон шаҳрида жойлашган Кореялараро алоқа офисини портлатиб юборди.
Шунингдек, КХДР ва АҚШ ўртасидаги муносабатлар ҳам кескинлигича қолмоқда. Улар ўртасидаги музокаралар тўхтаб қолган.
Аввалроқ АҚШ президенти Дональд Трамп КХДРга нисбатан санкцияларни яна бир йилга узайтирган, Ким Чен Ин эса Жанубий Кореяга қарши ҳарбий ҳаракатлар режасини тўхтатиб туришга қарор қилган эди.
Изоҳ (0)