Seul Pxenyanni Koreyalararo kelishuvga amal qilishga chaqirdi

Janubiy Koreya hukumati Shimoliy Koreya bilan bog‘liq har qanday vaziyat yuzasidan javob berishga tayyorligini ta’kidlab, KXDRni ikki mamlakat o‘rtasidagi harbiy bitim bo‘yicha kelishuvlarini amalga oshirishga chaqirdi. Bu haqda “TASS” xabar bermoqda.

Tegishli bayonot mamlakat Mudofaa vazirligi tomonidan, Koreya mehnat partiyasi markaziy qo‘mitasi bo‘lim boshlig‘ining birinchi o‘rinbosari Kim Yo Chjon (KXDR yetakchisi Kim Chen Inning singlisi) Pxenyan yaqin kelajakda Janubiy Koreyaga nisbatan keyingi qadamni qo‘ymoqchi ekanligini aytganidan so‘ng, ertasi kuni e’lon qilingan.

Qayd etilishicha, mamlakatlar o‘rtasida tuzilgan bitimga amal qilish lozimligini birlashgan vazirlik ham ta’kidlagan. 14-iyun kuni Janubiy Koreyaning xavfsizlik masalalari bo‘yicha javobgar bo‘lgan yuqori martabali rasmiylari Pxenyan tahdidlarini muhokama qilish uchun favqulodda yig‘ilish o‘tkazgan.

Eslatib o‘tamiz, uzoq yillar davomida ishlamagan aloqa liniyalari 2018-yilda qayta tiklangan edi. Shundan so‘ng mamlakatlar kuniga ikki marotaba o‘zaro qo‘ng‘iroqlashib turgan. Pxenyanga qarshi yuborilgan tashviqot varaqalari sabab KXDR hukumati 2020-yil 9-iyun kuni Janubiy Koreya bilan mavjud barcha aloqa kanallarini to‘xtatdi. Shimoliy Koreyaga hatto harbiy aloqa liniyalari orqali ham qo‘ng‘iroq qilishning imkoni bo‘lmagan. Bundan tashqari, ikki Koreya birlashgan ishlari bo‘yicha vazirligi ham aloqani o‘rnata olmagan.

2018-yil 27-aprel kuni ikki davlat rahbarlari Kim Chen In va Mun Chje In Pxanmundjom sammiti yakunlariga ko‘ra tinchlik, farovonlik va Koreya yarimorolini birlashtirish to‘g‘risida qo‘shma deklaratsiya imzolagan. Unda yarimorolni to‘liq yadrosizlantirish, ikki mamlakat o‘rtasida qat’iy tinchlik shartnomasini imzolash va gumanitar sohada hamkorlikni yanada rivojlantirishga oid maqsadlar ko‘zda tutilgan.

Ushbu maqsadlar o‘sha yilning sentabrida Pxenyanda o‘tkazilgan sammitda ham tasdiqlangan, biroq haligacha amalga oshmadi.