Мисрда беш нафар блогер қиз ижтимоий тармоқларда эълон қилган видеороликлари сабаб икки йилга озодликдан маҳрум этилди, деб хабар беради Reuters.
Маълумотларга кўра, суд уларни ахлоқсизликни тарғиб қилишда ва одам савдосида айбдор деб топган. Маҳкумларнинг ҳар бири 18,7 минг доллар миқдорида жарима тўлаши ҳам керак.
Суд 20 ёшли талаба Ханин Хоссам қизларни эркаклар билан видеоилова орқали танишишга ундагани ва улардан бунинг эвазига пул олгани учун айбдор деб топган.
Маваду Ал-Адҳам эса TikTok ва Instagram’да уятли видео ва суратларни эълон қилгани учун судланган.
Исми ошкор этилмаган яна уч нафар қиз Хоссам ва Ал-Адҳамга аккаунтларини юритишда ёрдам бергани учун айбдор деб топилган.
Ҳимоя томони ҳукм устидан шикоят қилиш ниятида.
Мисрда бир неча йил олдин интернет устидан қаттиқ назорат жорий этилган, шу қаторда, беш мингдан ошиқ обуначига эга шахсий аккаунтларни кузатиш имконини берадиган қонунлар қабул қилинган.
Изоҳ (0)