Тошкентда коронавирусга чалинган 32 ёшли ҳомиладор аёл вафот этди

Тошкент шаҳрида коронавирусга чалинган 32 ёшли аёл вафот этди. Бу ҳақда Соғлиқни сақлаш вазирлиги хабар қилган.

Хабарда қайд этилишича, Тошкент шаҳар Сергели туманида яшаган 32 ёшли Д.И. исмли аёлда 2 июлдан ҳолсизлик, иситма 38 даражагача кўтарилиши ва йўтал бошланган ҳамда 6 июль куни у «Бебимед» хусусий клиникасига мурожаат қилган. 9 июлга қадар уй шароитида даволанган.

9 июлдан бошлаб шаҳар 7-сонли туғруқ комплексида 29 ҳафталик 5-ҳомиладорлик, 4-туғруқ, икки томонлама пневмония, семизликнинг 2-даражаси, камқонлик ташхиси билан стационар шароитида даволанган.

Д.И.да COVID-19 тасдиқлангандан сўнг эса 17 июль куни шаҳар 3-сонли туғруқ комплексига ўта оғир аҳволда ўтказилган. У ерда унга COVID-19 инфекциясининг ўта оғир кечиши, икки томонлама пневмония ташхиси қўйилган. Касаллик ўткир нафас ва юрак-қон томир етишмовчилиги асорати билан кечган.

Беморда 30 ҳафталик ҳомиладорлик, шунингдек, асоратланган акушерлик анамнези, ҳомиланинг антенатал ўлими, қандли диабет ва семизликнинг 2-даражаси бўлган.

«Беморнинг асосий касаллик асоратлари ҳисобига аҳволи кескин оғирлашиб, мутахассислар томонидан стандарт асосида ўтказилган реанимацион чораларга қарамай у ўткир респиратор дистресс синдроми, ўткир нафас ва юрак-қон томир етишмовчилиги, ўпка шиши, полиорган етишмовчиликдан вафот этган», — дея хабар берган ССВ.

Ҳозиргача Соғлиқни сақлаш вазирлиги 116 кишининг коронавирус асоратларидан вафот этганини хабар берди (аввалроқ коронавирусга чалинган жиззахлик 62 ёшли эркак вафот этгани ҳақида хабар берилган эди). «Дарё» ҳисоби бўйича коронавирусга чалингач вафот этганлар сони 122 нафарни ташкил этмоқда.

Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган.

Шунингдек, 22 июлда бош прокурорнинг собиқ ўринбосари, ҳозирда Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов, Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова коронавирус асоратларидан вафот этгани хабар қилинган.

Бироқ ушбу олти ҳолат юзасидан ССВ томонидан айни вақтгача ахборот берилмаган.