2019 йил 23 сентябрда Туркиянинг Адолат ва тараққиёт партияси депутати Ширин Уналнинг Анқарадаги уйида вафот этган Нодира Қодирова иши ва прокуратуранинг гумонланувчини судга тортмаслик тўғрисидаги қарори 24 июль куни Уналнинг Авлиё София масжидидаги намоздан сўнг қолдирган твити туфайли яна кун тартибига чиқди.
Авлиё Софияни янгидан масжид сифатида очилиши доирасида бўлиб ўтган Жума намозида қатнашган Унал масжиднинг таклиф қилинган меҳмонларгина кириши мумкин бўлган ички қисмида тушган фотосуратини илова қилган ҳолда «Авлиё София масжидидамиз. Буни насиб айлаган Аллоҳга шукрлар бўлсин. Раис (Эрдўғон) бошчилигидаги меҳнати синган барчадан Аллоҳ рози бўлсин. #Juma муборак бўлсин», дея Twitter’да ёзув қолдирган.
https://twitter.com/SIRIN_UNAL/status/1286592442138013697
Уналнинг бу твитига журналистлар, адвокатлар, инсон ҳуқуқи ҳимоячилари ва бошқа фойдаланувчилар #NadirayaNeOldu (Нодирага нима бўлди?) ҳештеги билан жавоблар ёзишди.
Уналнинг жума куни кечқурун ёзган ушбу твити остига ёзилган изоҳлар сони 20 мингдан ошди. 5 мингдан ортиқ киши эса мазкур ҳештег билан ретвит қилди. Натижада #NadirayaNeOldu ҳештеги Twitter’даги трендлардан бирига айланди.
Ижтимоий тармоқ фойдаланувчиларидан бири эса кескин руҳда «Қотилларнинг дуоси қабул бўлмайди», дея изоҳ қолдирган.
«Ҳисоб бермагунча сўрашда давом этамиз! Нодира Қодирова Ширин Уналнинг уйида ўлик ҳолда топилди, барча шубҳаларга қарамай, самарали тергов ўтказиш ўрнига гумонланувчини жиноий жавобгарликка тортмаслик тўғрисида қарор қилинди. Жим бўлиб қолаётганимиз йўқ, адолатнинг этагини қўйиб юбормаймиз!», — деган бошқа бир фойдаланувчи.
«Авлиё София муҳожир бир аёл-ишчининг депутатнинг уйида тағин айнан ўша депутатнинг қуролидан ўқ узилиши натижасида ўлим топганини ҳам пардалай оладими?», — дея савол қўйилган яна бир твитда.
«Масжидга борганинг билан қилган ишларингни яшира олмайсан. Аллоҳ билиб турибди», — деган бошқа бир фойдаланувчи.
«Авлиё Софияда фақатгина мозаикалар эмас, жиноят ва гуноҳлар ҳам пардаланди», — деган яна бири.
Эслатиб ўтамиз, 2019 йилнинг 23 сентябрь куни ўзбекистонлик 23 яшар қиз Нодира Қодирова Туркиянинг Анқара шаҳрида депутат Ширин Уналнинг уйида вафот этган эди. Президент Ражаб Тоййип Эрдўғоннинг «Адолат ва тараққиёт» партиясидан Миллат мажлиси депутатлигига сайланган Ширин Уналнинг уйида хизматчи бўлиб ишлаган Қодирова вафоти бўйича тергов ҳаракатлари 5 ойдан ортиқ вақт давом этган.
Воқеа юз берган илк дақиқаларданоқ Ширин Унал ва унинг оиласи Нодира Қодирова ўз жонига қасд қилганини таъкидлаб келмоқда. Бу орада у марҳумни психлогик жиҳатдан носоғломга, шунингдек, тарбияси бузуққа чиқаришга уринди. Қодированинг оила аъзолари, жумладан, воқеа юз берган вақтда Анқарада бўлган акаси Муҳаммадали Қодиров эса синглиси ўз жонига қасд қилмагани, балки ўлдирилганини айтмоқда. Тергов хулосаларида қайд этилишича, Қодированинг ўлимида ишлатилган Баретта русумидаги қуролда бармоқ излари аниқланмаган.
Изоҳ (0)