Фарғона вилоятида уч ойлик дори-дармон захирасини яратиш учун 10 миллиард сўмдан ортиқ маблағ ажратилган. Бу ҳақда вилоят ҳокими Шуҳрат Ғаниев иштирокидаги онлайн брифингда маълум қилинди, дея хабар берди «Дарё» мухбири.
«Фарғона вилоятида бугунги кунда 1224 та дорихона фаолият олиб бормоқда. Ушбу дорихоналарнинг 229 таси ижтимоий, 13 таси кўчма ва 47 таси дори-дармонни ўзида ишлаб чиқарувчи дорихоналар ҳисобланади. Мазкур дорихоналарда инфекцияга қарши 61 турдаги дори-дармон захираси яратилган. Куни кеча давлатимиз раҳбарининг топшириқларига мувофиқ вилоятимизда уч ойлик дори захирани яратиш учун дори-дармон таъминоти билан шуғулланадиган акциядорлик жамиятига, соғлиқни сақлаш бошқармасига ва санитария эпидемиология марказига 10 миллиард сўмдан ортиқ маблағ ажратиб берилди», — деди Шуҳрат Ғаниев.
Вилоят ҳокими тиббиёт муассасаларида беморларни қабул қилиш ва даволаш учун барча зарур шароитлар яратилганини таъкидлаб, фуқароларни хавотирга тушмасликка чақирди.
«COVID-19 инфекциясига чалинган беморларни даволаш қанчалик муҳим эканлиги тўғрисида вилоят ахборот хизматига кўплаб савол ва мурожаатлар келиб тушмоқда. Таъкидлашим керак, бугунги кунда 2-сонли вилоят юқумли касалликлар шифохонасида барча шароитлар яратилган. Дори-дармон захираси етарли миқдорда ташкил этилган. Беморларга юқори малакали шифокорлар хизмат кўрсатяпти. Яна бир муҳим масала, вилоятимизда тиббиёт масканларида коронавирусга қарши курашиш мақсадида 2791 та ўрин-жой тайёрлаб қўйилган. Жорий йилнинг 1 августига қадар яна қўшимча 9600 та захира ўрин тайёрланмоқда. Шунинг учун фуқароларимиздан хавотирга тушмасликни сўрардик», — деди вилоят ҳокими.
Мавзуга доир:
- Қашқадарё ҳокими: Вилоятдаги тез ёрдам машиналарининг 80 таси эскирган, тизимда 15 та машина етишмайди
- Эркинжон Турдимов: Бугунги кунда COVID-19 касаллигига қарши уруш қиляпмиз. Бу жангнинг олдида тиббиёт ходимлари турибди
- Андижон ҳокими: Кучайтирилган карантин сабаб 12 мингдан ортиқ фуқаро ишсиз қолди
Изоҳ (0)