Фарғона вилоятида аҳолига тез тиббий ёрдам кўрсатиш учун 304 та мобил гуруҳ фаолият олиб бормоқда. Шунингдек, вилоятдаги 4 та шаҳар ва 15 та туманга 46 та реаномобил гуруҳи бириктирилган. Бу ҳақда Фарғона вилояти ҳокими Шуҳрат Ғаниев иштирокидаги онлайн брифингда маълум қилинди, дея хабар берди «Дарё» мухбири.
Қайд этилишича, Шуҳрат Ғаниев журналистларга пандемия бўйича вилоятидаги ҳолат ҳақида ахборот берган.
«Вилоятда бугунги кунда коронавирусга чалинган беморларнинг 21 нафари даволанмоқда. Беморларнинг 6 нафари Сўх туман юқумли касалликлар шифохонасига, 15 нафари эса Фарғона вилоят юқумли касалликлар шифохонасига ётқизилган. Даволанаётганларнинг 4 нафари оғир аҳволда бўлса, қолган беморларнинг бугунги кундаги ҳолати, тиббиёт ходимларининг хулосасига кўра, қониқарли даражада. Вилоятда бугунги кунда 1138 та хонадонда 1651 нафар фуқаро карантинга олинган», — деди Шуҳрат Ғаниев.
Ҳоким вилоятдаги тез тиббий ёрдам бўйича мавжуд вазиятга ҳам тўхталган.
«Фарғонадаги 4 та шаҳар ва 15 та туманга 46 та реаномобил гуруҳ бириктирилган. Пандемия даврида касалликнинг олдини олиш, ушбу инфекция билан касалланган, лекин аломатсиз кечаётган беморларни уй шароитида даволашни назорат қилиш ва уларга кўмак бериш мақсадида тиббиёт муассасаларидаги ходимлар ҳамда вирусолог, эпидемиолог мутахассислардан иборат 137 та тиббий гуруҳ ташкил этилган. Айни кунда вилоятда касалликни аниқловчи 7 та лаборатория фаолият кўрсатмоқда. Буларнинг барчаси давлат ҳисобидаги лабораториялар бўлиб, 2020 йил 15 июлдан бошлаб яна 5 та хусусий тиббиёт клиникаларида ҳам таҳлиллар ўтказишга рухсат берилди. Бу хусусий клиникалардан 4 таси Фарғона шаҳрида, 1 таси Қўқон шаҳрида фаолият олиб бормоқда», — деди вилоят ҳокими.
Изоҳ (0)