Соғлиқни сақлаш вазирлиги Жиззах вилоятида коронавирусга чалинган 64 ёшли эркакнинг вафот этганини хабар қилди.
Хабарга кўра, Жиззах вилояти Бахмал туманида яшаган 64 ёшли Б.Ш. исмли эркакда COVID-19 тасдиқлангач, у вилоят юқумли касалликлар шифохонасига ётқизилган.
Шифохонада унга COVID-19 инфекциясининг ўта оғир кечиши, икки томонлама пневмония ташхиси қўйилган. Касаллик ўткир нафас етишмовчилиги, полиорган етишмовчилик асорати билан кечган.
Шунингдек, беморда юрак ишемик касаллиги, зўриқиш стенокардияси, гипертония, қандли диабет, семизликнинг 3-даражаси каби ҳамроҳ касалликлар ҳам бўлган.
«Беморнинг аҳволи кескин оғирлашган ва юрак-қон томир етишмовчилиги, сатурация кўрсаткичи пасайиб бориши, нафас олишининг қийинлашуви бўйича мутахассислар томонидан ўтказилган реанимацион чораларга қарамай ўткир нафас ва юрак-қон томир етишмовчилигидан вафот этган», — дейилади Соғлиқни сақлаш вазирлигининг хабарида. Беморнинг қайси санада вафот этгани расмий ахборотда маълум қилинмаган.
Жиззах вилоятида COVID-19 асоратларидан вафот этган беморлар сони 6 нафарга етди.
Ҳозиргача Соғлиқни сақлаш вазирлиги 115 кишининг коронавирус асоратларидан вафот этганини хабар берди (Тошкент шаҳри Шайхонтоҳур туманида яшаган 67 ёшли Т.З. вафот этгани ҳақида хабар берилган эди). «Дарё» ҳисоби бўйича коронавирусга чалингач вафот этганлар сони 121 нафарни ташкил этмоқда.
Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган.
Шунингдек, 22 июлда бош прокурорнинг собиқ ўринбосари, ҳозирда Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов, Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова коронавирус асоратларидан вафот этгани хабар қилинган. Бироқ ушбу олти ҳолат юзасидан ССВ томонидан айни вақтгача ахборот берилмаган.