Коронавируснинг бошқа шамоллаш ва ўткир респиратор касалликлардан фарқли бўлган жиҳатлари айтилди

АОКА штабида ташкил қилинган брифингда Санитария эпидемиология назорати давлат инспекцияси раҳбари Нурмат Отабеков ЎРВИ, шамоллаш, тумовнинг коронавирусдан фарқли жиҳатларига тўхталиб ўтди.

Мутахассис коронавирус касаллигида ҳам кўп учрайдиган айрим эрта белгилар шамоллаш, ўткир респиратор вирусли касалликлари ва грипп касаллиги белгиларига ўхшашини алоҳида таъкидлади. Жумладан:

• тана ҳароратининг кўтарилиши;
• умумий ҳолсизлик;
• иштаҳанинг йўқолиши;
• мушаклардаги оғриқ;
• таъм ва ҳид сезмаслик.

Аммо коронавирус ўрта оғир ва ўта оғир кечишида касалликнинг 5—7-кунида тана ҳарорати 38-39 даражадан ошади, нафас етишмовчилиги, ҳансираш пайдо бўлади, оддий шамоллаш ва гриппда эса аксинча 3-4 кундан кейин бемор аҳволи яхшиланиб боради. Бундан ташқари, коронавирус касаллигини аниқ ташхислаш учун эпидемиологик анамнез, ПЗР текшируви жавоби мусбат бўлиши, кислород сатурацияси 90% дан камайиши, МСКТда характерли «буғли ойна» симптоми кузатилишини инобатга олиш зарурлиги қўшимча қилинди.Вируснинг яширин (инкубацион) даври 2 кундан 12 кунгача чўзилади, бироқ ўртача 7 кунни ташкил этади. Коронавирус юққандан кейин 2 кундан 12 кунгача ўз симптомларини сездирмаслиги мумкин. Бу вақтда яширин вирус ташувчи киши ўзининг хасталанганини билмаган ҳолда мулоқотга киришган кишиларга, оила аъзоларига касалликни юқтириши мумкин. Отабеков бу даврда фақатгина тест топшириш орқали касаллик борлигини аниқлаш мумкинлигига урғу берди.