Наманган вилоятининг Учқўрғон туманида бошқага унаштирилган қизни рашк қилиб, унга 5 маротаба пичоқ урган 19 яшар йигитга суд ҳукми ўқилди. Бу ҳақда «Дарё»га жиноят ишлари бўйича Норин туман суди раиси Жасур Қурбонов маълум қилди.
Жиноий иш материалларида очиқланишича, воқеа Учқўрғон туманида 2020 йил январь ойида рўй берган. Тумандаги мактаблардан бирининг 11-синфида таҳсил олаётган Ҳикмат Мўминов (исм-шарифлар шартли) ўзидан катта синфда ўқиб, мактабни битириб кетган Лобар Олимовага кўнгил қўяди. Бироқ қиз 2019 йил декабрь ойида бошқа бир йигитга унаштирилади.
Ҳикмат 2020 йил 29 январь куни Лобар билан кўришиб, уни одамлардан холи бўлган «Қозоқовул» маҳалласи ҳудудидан оқиб ўтувчи «Тўдаариқ» канали бўйига олиб боради. Юрак соҳасига 5 маротаба уриб, қизни қасддан ўлдиради.
Шундан сўнг қўлидаги пичоқ билан ўзига ҳам 2 маротаба уриб, енгил тан жароҳати етказади. Бироқ жонига қасд қила олмасдан, воқеа жойидан яширинган.
Тезкор қидирув давомида Ҳ. Мўминов 2020 йил 30 январь куни соат 02:00 да Учқўрғон тумани, «Ўлжатўпи» МФЙ ҳудудидаги қабристонда яшириниб юрган вақтида ушланган.
Судга оид тиббий экспертизасининг 2020 йил 15 февралдаги хулосасида марҳуманинг ўлими кўкрак қафаси чап томони кўкрак бўшлиғига тешиб кирувчи кесилган санчилган жароҳати, ўткир ички ва ташқи қон кетиши, постгеморагик ва плевропульмонал шок, ўткир юрак қон томир ва нафас етишмовчилигидан келиб чиққани, ушбу жароҳатлар уни ўлимга олиб келган оғир тан жароҳат ҳисобланиши кўрсатилган.
— Судланувчи суд жараёнида айбига қисман иқрор бўлди. Унинг баён этишича, Лобар Олимова аввал уни, сўнг ўзини ўлдиришини илтимос қилган ва йигитнинг қўлига пичоқ тутқизган. Ҳикмат унаштирилган йигитдан рашк қилиб, қизга бир неча бор пичоқ уриб юборган. Ўзининг чап кўкрагига ҳам 2 маротаба урган. Танаси оғригани учун ўзини ўлдира олмасдан, воқеа жойига пичоқни ташлаб, кетиб қолган ва ички ишлар ходимлари томонидан қўлга олинган. Бироқ тўпланган важ-далиллар бу кўрсатмаларни инкор қилди. Қолаверса, Наманган вилоят руҳий асаб касалликлар шифохонасининг 2020 йил 29- февралдаги хулосасида Ҳ.Мўминов жиноят содир этган вақтда ажабланиш, қўрқиш ёки руҳий ҳаяжонланиш ҳолатида бўлмаганлиги кўрсатилган, — дейди Ж. Қурбонов.
Жиноят ишлари бўйича Норин туман судининг 2020 йил 6 июлдаги ҳукми билан Ҳикмат Мўминов 11 йилга озодликдан маҳрум этилди. Судланувчининг адвокати бу юзасидан тегишли тартибда аппеляция берилишини билдирди.
Изоҳ (0)