Бугун,

  • USD 11014.01
  • RUB 191.8
  • EUR 10674.78

Соғлиқни сақлаш вазирлиги Сурхондарё вилояти Термиз шаҳрида яшаган, коронавирусга чалинган 40 ёшли Т.Х. исмли эркакнинг вафот этганини хабар қилди.

Хабарга кўра, Сурхондарё вилояти Термиз шаҳрида яшаган 40 ёшли Т.Х.да 12 июль куни COVID-19 инфекцияси борлиги тасдиқланган ва у вилоят кўп тармоқли тиббиёт маркази жонлантириш бўлимига ётқизилган.

Унга COVID-19 инфекциясининг ўта оғир кечиши, икки томонлама пневмония ташхиси қўйилган. Хасталик ўткир нафас етишмовчилиги, ўткир респиратор дистресс синдроми, ўткир юрак-қон томир етишмовчилиги, полиорган етишмовчилиги асоратлари билан кечган. Шунингдек, бемор гипертония ҳамроҳ касаллиги билан ҳам оғриган.

Беморга мутахассислар томонидан онлайн консультация ва консилиумлар ўтказилган, даволаш жараёни белгиланган стандартлар асосида олиб борилган.

Аммо шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, у ўткир нафас ва юрак қон-томир етишмовчилиги, терминал ўпка шишидан вафот этган, дейилади ССВ хабарида.

Бу «Дарё» ҳисоби бўйича 103-ўлим ҳолати. ССВ ҳозиргача ушбу ўлим ҳолатларининг 98 таси ҳақида расман ахборот берган. Т.Х. Сурхондарё вилоятида COVID-19 асоратларидан вафот этган 6-қурбон.

Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган. Шунингдек, 22 июлда Бош прокурорнинг собиқ ўринбосари Ҳакимбай Халимов 66 ёшида коронавирус асоратларидан вафот этгани хабар қилинган. Бироқ ушбу ҳолатлар ҳақида ССВ томонидан айни вақтгача ахборот берилмаган.

Изоҳ
Асосий янгиликлар