Тошкентнинг Олмазор туманидаги бильярдхонада жанжал кўтарган шахсларга нисбатан жиноий иш очилди

Тошкент шаҳар Олмазор туманидаги бильярдхонада тунги вақтда жанжал келтириб чиқарган шахслар қўлга олинди, деб хабар беради Тергов департаменти.

Қайд этилишича, 2020 йилнинг 17 февралидан 18 февралга ўтар кечаси тахминан соат 01:00 да 32 ёшли А.С. жиноий шериги 29 ёшли Х.Ғ. Тошкент шаҳар Олмазор туманида жойлашган бильярд клубига спиртли ичимлик таъсирида маст ҳолатда келган. Мазкур клуб иш бошқарувчиси 55 ёшли Д.И. иш вақти якунланганини айтса-да, улар жамиятда юриш-туриш қоидаларини қасддан менсимасдан, Д.И.ни ахлоқсиз сўзлар билан ҳақорат қилиб, сабабсиз уриб дўппослаган.

Ўша вақтда бильярд клубда бўлган ишчилар ва мижозлар А.С. ва Х.Ғ.нинг безорилик ҳаракатларининг олдини олиш чорасини кўрганликларига қарамай, уларга жиддий қаршилик кўрсатиб бильярд тошларини отиб, ўзларидан узоқлаштирган. Шундан сўнг безорилар такроран Д.И.нинг баданига стул билан уриб, муштлари билан юзига ва баданининг турли жойларига уриб дўппослаган. Д.И.га соғлиқни қисқа муддатга бузилишига олиб келган енгил тан жароҳатлари етказиб, ҳодиса жойидан яширинган.

Мазкур ҳолат юзасидан Олмазор тумани бўйича ИИО ФМБ ҳузуридаги Тергов бўлими томонидан жиноят иши қўзғатилиб, дастлабки тергов ҳаракатлари натижасига кўра А.С. ва Х.Ғ.га Жиноят кодексининг 277-моддаси 3-қисми «г» банди (Жамоат тартибини сақлаш вазифасини бажариб турган ҳокимият вакили ёки жамоатчилик вакилига ёхуд безорилик ҳаракатларининг олдини олиш чорасини кўрган бошқа фуқароларга қаршилик кўрсатиб содир этилган безорилик) билан айб эълон қилиниб, жиноят иши туман прокуратурасига юборилган.

Эслатиб ўтамиз, мазкур жиноятни содир этган шахс 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш билан жазоланади.