Сирдарё вилоятида коронавирус асоратлари оқибатида вафот этган илк бемор тиббиёт ходими бўлган. Бу ҳақда вилоят ҳокими Ғофуржон Мирзаев 20 июль, душанба куни бўлиб ўтган брифингда маълум қилди.
«Албатта, ҳар бир рақам ортида инсон ҳаёти ётганлигини ҳаммамиз тўғри тушуниб турибмиз. Минг афсус, Гулистон туманидан бўлган, кўп йиллар тиббиёт тизимида самарали меҳнат қилган инсон айнан касаллик асорати сабабли вафот этди. У кишининг яқинларига таъзиямизни изҳор қилган ҳолда одамларимизни яна бир бор ҳушёрликка чақирамиз», — деди Ғофуржон Мирзаев.
Вилоят ҳокимлиги хабарида шифокорнинг мутахассислиги, қаерда ишлагани, коронавирус беморлари билан алоқада бўлган ёки бўлмагани, касалликни қандай юқтирганига аниқлик киритилмаган.
Соғлиқни сақлаш вазирлиги мазкур шифокорнинг ўлими ҳақида 18 июль куни хабар берганди. Вазирлик хабарига кўра, 69 ёшли эркакда 11 июль куни COVID-19 тасдиқланган ва Сирдарё вилоят юқумли касалликлар шифохонасининг реанимация бўлимига ётқизилган. Беморга миокард инфаркти, COVID-19 инфекцияси, икки томонлама пневмония ташхиси қўйилган. У ўткир юрак-қон томир ва нафас етишмовчилигидан вафот этган.
Эслатиб ўтамиз, Яккасарой туман тиббиёт бирлашмасининг ходими Алишер Уралов Юқори Чирчиқ туманидаги карантин марказида хизмат олиб бориш жараёнида коронавирус билан касалланиб вафот этганди. Соғлиқни сақлаш вазири Алишер Шодмонов шифокорнинг хонадонига ташриф буюриб, унинг оиласига ҳамдардлик билдирганди. Шунингдек, марҳум шифокорнинг оиласига 250 миллион сўм компенсация тўланганди.
Бундан ташқари, Тошкент шаҳар Олмазор тумани «Мирзо Ғолиб» маҳалласида жойлашган 18-оилавий поликлиника катта ҳамшираси Феруза Тўхтаева ҳам коронавирус инфекцияси асоратлари оқибатида вафот этди.
Изоҳ (0)