Ўзбекистон аҳолисида антитана таҳлилини ўтказиш режалаштирилмоқда. Олинган намуналардан фуқароларнинг қанчасида коронавирусга қарши иммун тизими борлигини исботлаш мумкин. Бу ҳақда 20 июль, душанба куни ўтказилган Халқаро пресс-клубнинг навбатдаги сессиясида Санитария-эпидемиология назорати давлат инспекцияси бошлиғи Нурмат Отабеков маълум қилди.
Унинг айтишича, Россиядаги баъзи бир маълумотларда одамларнинг 70 фоизигача антитана бор деган хулосалар пайдо бўляпти. Бу унчалик ҳақиқатга яқин эмас.
Нурмат Отабековнинг таъкидлашича, касаллик Ўзбекистонда 15 мартда қайд этилган бўлса-да, лекин бу инфекция республикага ундан аввалроқ кириб келган, деган тахминлар ҳам бор. Одамлардан олинган намуналардан антитаналарни аниқлаш орқали аҳолининг қанча фоизида иммун тизими борлигини исботлаш мумкин бўлади. Бу келгусида касаллик кўрсаткичи қанчага кўтарилиши мумкинлигини башорат қилиш имкониятини ҳам беради.
«Биз аниқ биламиз, касалликка чалинган одамлар инфекцияни юқтирганидан кейин еттинчи, саккизинчи куни давом этаётган бўлса, у ҳолатда организмда антитаналар ишлаб чиқариш бошланади. Биз антитаналарни аниқлаш усулларини ҳам амалиётга киритиш орқали ПЗР лабораторияларига бўлаётган юкламаларни бир мунчага камайтиришга ҳаракат қиляпмиз.
Асосий мақсад, ким текширишга муҳтож бўлса, кимнинг таҳлилини амалга ошириш ўта зарур бўлса, шунга аҳамият қаратишимиз керак бўлади», — дейди Нурмат Отабеков.
9 июль куни Республика махсус комиссиясининг карантин чораларини кучайтириш борасидаги қарори юзасидан ўтказилган брифингда Коронавирусга қарши кураш штаби аъзоси, профессор Ҳабибулла Оқилов ҳам коронавирусга ҳосил бўлган антитаначаларни аниқлаш методикалари Ўзбекистонга энди олиб келинаётганини билдирганди.
Махсус комиссия қарори билан давлат тиббиёт муассасаларидан ташқари хусусий муассасаларга ҳам ПЗР ва ИФА таҳлилларини ўтказиш учун рухсат берилган.
14 июль куни ўтказилган брифингда эса Ҳабибулла Оқилов коронавирусдан тузалган беморларда 3 ойгача антитаналар сақланиб қолишини айтганди.
Изоҳ (0)