Ўзбекистонда тез тиббий ёрдамда фаолият олиб борадиган ходимларга қўшимча рағбатлантириш пули тўланади. Бу Вазирлар Маҳкамасининг 20 июлда қабул қилинган «Коронавирус инфекциясига қарши кураш даврида аҳолини тез тиббий ёрдам хизмати билан кенг қамраб олиш чора-тадбирлари тўғрисида»ги қарорда белгилаб қўйилди.
Соғлиқни сақлаш вазирлигининг маълум қилишича, қарорга мувофиқ, 2020 йил 20 июлдан коронавирус эпидемияси даврида нормативга қўшимча равишда кеча-ю кундуз навбатчилик қиладиган 1 нафар тиббиёт ходими ва 1 нафар ҳайдовчидан иборат ихчамлаштирилган мобил тез тиббий ёрдам бригадалари ташкил этилади.
Кучайтирилган тартиб даврида ҳар ой якунига қадар барча тез тиббий ёрдам бригадаларида ишловчи ходимларнинг лавозим маошига 6 фоиз миқдорида ҳар кунлик қўшимча тўловлар ўрнига қуйидаги миқдорларда қўшимча моддий рағбатлантириш тўловлари белгиланади:
- шифокор ходимларга — 2,5 миллион сўм;
- ўрта тиббиёт ходимларига — 1,5 миллион сўм;
- ҳайдовчиларга — 1,0 миллион сўм.
Аввалроқ Тошкент шаҳрида 3 кунда тез тиббий ёрдамнинг вақтида етиб бормагани сабабли 43 киши турли касалликлар билан вафот этгани хабар қилинганди. Шунингдек, пойтахтнинг тез тиббий ёрдам хизматида ишлайдиган ходим ҳозирги мураккаб вазият ҳақида гапирди.
Тошкент шаҳар ҳокимлиги коронавирусга қарши кураш учун Damas автомобилларини сотиб олди.
Изоҳ (0)