Тошкент вилояти ҳокими: Бир кунда тез ёрдамга бўлган чақирувларнинг 30 таси иситма билан боғлиқ, лекин 506 киши касалхонага ётқизилган. Бундай даволашнинг нима кераги бор?

Тошкент вилояти ҳокимлигида 20 июль куни Соғлиқни сақлаш вазири ўринбосари Улуғбек Собиров иштирокида видеоселектор бўлиб ўтди.

Тошкент вилояти ҳокимлиги ахборот хизматидан «Дарё»га маълум қилишларича, йиғилишда ССВ масъули ҳудуддаги 22 та туман шаҳар ҳокимлари ва сектор раҳбарларига коронавирус инфекциясига қарши кураш амалиётига қандай раҳбарлик қилиш, жараённи назоратда ушлаш бўйича муфассал тушунтириш берган.

Бунда беморлар ва уларни даволашда иштирок этаётганлар билан мулоқотда бўлиш, иш олиб бориш методикасини ўзгартириш масаласи ҳам кўриб чиқилган. Йиғилиш давомида вилоят ҳокими Рустам Холматов айрим туман ҳокимларининг сусткашлигини қоралади. Хусусан, аввал ажратилган мобил рентген қурилмалари ҳали ҳам Чирчиқ шаҳрига, Паркент, Қибрай, Оққўрғон туманларига олиб бориб ўрнатилмагани танқид қилган.

«Бу ҳолат сиёсатга хиёнат», — деб алоҳида таъкидлаган вилоят ҳокими. Шунингдек, Рустам Холматов мобил гуруҳлар, call-марказлар ва бошқа умумий ишларга тез ёрдам машиналарини жалб этмаслик бўйича ҳудудлар раҳбарларини огоҳлантирган. Асосий вазифаси аҳолига тиббий ва психологик маслаҳат бериш бўлган call-марказларга асосан ёшлар жалб этилгани нотўғри эканини таъкидлаган.

«Call-марказдаги вакилимиз туман раҳбарлари устидан жамоатчилик назоратини ўрнатишга салоҳияти етадиган, ҳудуднинг обрўли одамларидан бўлиши керак. Қаерда бирор эътиборсизлик бўлса, ҳокимга, тиббиёт бўлимига очиқ гапира олиши керак», — деб таъкидлаган вилоят раҳбари.

Ҳокимнинг алоҳида таъкидлашича, ваҳима остида тез ёрдамга мурожаат қилганларнинг барини касалхоналарга жойлаштиришдан мантиқ йўқ, аксинча, бу ваҳиманинг янада ортишига сабаб бўлади. «Кеча тез ёрдамга 4290 та чақирув бўлган, шундан 30 таси тана ҳарорати кўтарилиши билан боғлиқ, лекин 506 фуқаро касалхонага ётқизилган. Бундай даволашнинг нима кераги бор? Охир-оқибат бундай тартиб касалликни даволашга хизмат қилмайди», — деган у.

Йиғилишда вилоят соғлиқни сақлаш бошқармаси бошлиғи Тўрақул Арзиқулов ушбу масала бўйича фикр билдириб, айрим туман ва шаҳар соғлиқни сақлаш бўлимлари раҳбарлари «ваҳима остида, чуқур ўрганмай, мурожаат қилган фуқароларни касалхонага ётқизиб қўйгани»ни таъкидлаган ва улардан ортиқ бундай қилмасликни, тез ёрдамга мурожаат қилган беморларни мобил гуруҳларнинг хулосаси билан касалхонага ётқизиш лозимлигини қайд этиб ўтган.