Ўзбекистонда 17 июль соат 23:30 дан 18 июль соат 23:30 га қадар коронавирус юқтириб олиш билан боғлиқ 579 та ҳолат қайд этилди. Бу 13 июль кунидаги антирекорддан (ўшанда 594 киши касаллангани маълум бўлганди) кейинги иккинчи натижа. Янги касалланиш ҳолатларидан сўнг Ўзбекистонда коронавирусга чалинганлар сони 16186 нафарга етди.
Янги касалланиш ҳолатлари
Янги касалланганларнинг- 138 нафари хориждан келиб карантинга олинганлар орасида;
- 441 нафари тана ҳарорати кўтарилганлиги туфайли профилактика мақсадида ҳамда коронавирусга чалинган беморлар билан мулоқотда бўлганлиги сабабли намуна олинган фуқаролар орасида (Тошкент шаҳрида — 216 нафар, Сирдарё вилоятида — 75 нафар, Андижон вилоятида — 40 нафар, Бухоро вилоятида — 25 нафар, Тошкент вилоятида — 22 нафар, Самарқанд вилоятида — 21 нафар, Жиззах вилоятида — 19 нафар, Қорақалпоғистон Республикасида — 9 нафар, Наманган вилоятида — 9 нафар, Навоий вилоятида — 4 нафар, Сурхондарё вилоятида — 1 нафар) аниқланган.
Тошкент шаҳрида тана ҳарорати кўтарилганлиги туфайли профилактика мақсадида ҳамда коронавирусга чалинган беморлар билан мулоқотда бўлганлиги сабабли намуна олинган фуқаролар орасида 216 та ҳолат қайд этилди. Шунингдек, хориждан келиб карантинга олинган фуқаролар орасидаги 138 нафар касалланган бемор ҳам Тошкент шаҳрида даволанаётган беморлар сафига қўшилди.
Сирдарё вилоятида касалланганлар сони бир кунда 75 нафарга кўпайди. Бу вилоят учун антирекорд ҳисобланади. Икки кун ичида Сирдарёда 110 кишида касаллик аниқланди. Вилоятда 17 июлгача аниқланган беморларнинг 34 фоизи охирги икки кунга тўғри келди. Сирдарё вилояти ҳудудидаги илк ўлим ҳолати ҳам шу кунларда қайд этилди.
Андижон вилоятида 40 кишида коронавирус аниқланди. Вилоятда ой бошидан бери коронавирусга чалинганлар сони 376 нафарга кўпайди. Бу вилоятдаги жами касалланиш ҳолатларининг 64 фоизига тенгдир. Андижон ҳозирда коронавирусдан биронтаям ўлим қайд этилмаган ягона ҳудуд бўлиб турибди.
Бухоро вилоятида коронавирусга чалинганлар сони 25 кишида кўпайди. Вилоятда май, июнь ва июль ойларида бирон марта ҳам бир кунлик касалланишлар сони 25 тага етмаганди. Бухоро Тошкент шаҳри, Тошкент вилояти ва Самарқанд вилоятидан сўнг коронавирусга чалинганлар 600 нафардан ошган тўртинчи ҳудуд бўлди. Лекин 500 лик довонга Самарқанддан олдин Бухоро етиб келганди. Самарқанд эса аллақачон 700 лик довондан ҳам ўтди. Бухорода июль ойида жами 95 кишида касаллик аниқланди.
Тошкент вилоятида 22 киши коронавирус юқтириб олгани қайд этилди. Вилоятда касаллик аниқланганлар сони 1700 нафарга етди.
Самарқанд вилоятида коронавирус инфекцияси 21 кишида аниқланди. Вилоятда июль ойи бошидан бери 274 кишида касаллик тасдиқланган. Бу жами касалланиш ҳолатларининг 38 фоизига тенг.
Жиззах вилоятида коронавирусга чалинганлар сони 19 кишида кўпайди. Ҳозирда касалланганлар сони 94 нафарни ташкил этмоқда. Ушбу ҳолатларнинг 84 таси июль ойида қайд этилди, бошқача айтганда, Жиззах вилоятида июль ойида касалланганлар сони 8 баравардан кўпроққа ошди. Ҳозирда Жиззах касалланганлар сони 100 нафарга етмаган ягона ҳудуд бўлиб турибди.
Қорақалпоғистон Республикасида 9 кишида касаллик қайд этилди. Республикада ой бошидан бери жами 124 кишида коронавирус аниқланиб, жами касалланганлар сони 275 нафарга етди. Қорақалпоғистондаги жами касалланиш ҳолатларининг 45 фоизи июль ойига тўғри келди.
Қорақалпоғистон Республикаси Жўқорғи Кенгеси раиси Муса Ерниязов ҳам коронавирусга чалингани 18 июль куни маълум бўлди. Ушбу хабар коронавирус бўйича «диагностика, даволашдан тортиб, эпидемиология, касаллик тарқалишининг олдини олиш, профилактика масалаларида ҳам янгича услублар қўлланилиши устида иш олиб бораётган» Соғлиқни сақлаш вазирлиги раҳбари Алишер Шодмоновнинг Қорақалпоғистонга ташриф буюргани ҳақидаги хабардан ойдинлашди. Беморларни даволаш учун хорижлик мутахассислар билан видеоконференция орқали мулоқот қилинган. Алишер Шодмонов кўп қатордаги беморлар билан биргаликда Муса Ерниязовнинг ҳам ҳолати хорижлик мутахассислар билан таҳлил қилинганини айтган: «Бугунги кунда ҳолати ‘стабил’, генодинамика, сатурация кўрсаткичлари ўзгаришсиз ҳолатда турибди. Мутахассисларнинг олиб борилаётган тактика тўғрилиги ҳақидаги энг муҳим фикрини эшитдик», — деди Соғлиқни сақлаш вазири. Қорақалпоғистон коронавирус билан боғлиқ энг мураккаб вазиятга тушиб қолган ҳудуд эмаслиги, ССВ раҳбари хорижлик экспертлар билан Тошкентда видеоконференс алоқа ўтказмай, Нукусда бу ишни бажаргани, Жўқорғи Кенгес раиси худди Сурхондарё вилояти ҳокими Тўра Боболов сингари Тошкентда даволанмаётгани 72 ёшли Муса Ерниязовнинг аҳволи бўйича хавотирлар уйғотишни бошлаган.
Наманган вилоятида кун давомида 9 кишида касаллик аниқланган. Вилоятда 12 июлдан бери ҳар куни янги касалланиш ҳолатлари аниқланмоқда. Наманганда июль ойида 196 кишида коронавирус қайд этилди, бу вилоятдаги жами касалланиш ҳолатларининг 40 фоизидир.
Навоий вилоятида коронавирусга чалинганлар сони 4 нафарга кўпайди. Ушбу ҳафта давомида вилоятда фақат 17 июль куни янги касалланиш ҳолатлари кузатилмади. Навоийда июль ойида 89 кишида коронавирус аниқланди. Бу вилоятдаги жами касалланиш ҳолатларининг 24 фоизига тенг.
Сурхондарё вилоятида фақат 1 кишида касаллик аниқланди. Вилоятда 14 июлдан бери ҳар куни янги ҳолатлар қайд этилмоқда. Ой бошидан бери Сурхондарёда 179 кишида коронавирус аниқланди. Вилоятда март, апрель, май ва июнь ойларида қанча касаллик аниқланган (101 та) бўлса, июль ойининг ўзида ундан қарийб 1,8 баравар кўп янги ҳолатлар қайд этилди.
Кун давомида Сурхондарё вилояти ҳокими Тўра Боболовнинг коронавирус инфекциясини юқтириб олиб, Тошкентда даволанаётгани, ҳолати барқарор эканлиги ҳақида хабар берилди.
Ўлим ҳолатлари ва аҳволи оғир беморлар
Соғлиқни сақлаш вазирлиги кун давомида Тошкент шаҳрида 2 нафар, Сирдарё ва Тошкент вилоятларида 1 нафардан, жами 4 нафар коронавирусга чалинган бемор вафот этгани ҳақида хабар берди. Шунингдек, Маданият вазирлиги 32 ёшли ходимининг вафоти ҳақида ҳам маълум қилди.Биринчи ўлим. Тошкент шаҳри Миробод туманида яшовчи 67 ёшли Н.С. исмли эркакда 14 июль куни COVID-19 тасдиқланган ва Вирусология илмий-текшириш институти клиникасига ётқизилган. Унга COVID-19 инфекцияси ўта оғир кечиши, икки томонлама пневмония ташхиси қўйилган. Хасталик ўткир нафас ва юрак-қон томир етишмовчилиги билан кечган. Шунингдек, гипертония, артериал гипертензия ҳамроҳ касалликлари билан ҳам оғриган.
Шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, ўткир юрак-қон томир ва нафас етишмовчилигидан вафот этган.
Иккинчи ўлим. Маданият вазирлиги ходими Акмал Ирисов вафот этгани ҳақида вазирлик матбуот хизмати хабар берди.
1988 йилда Самарқанд вилояти Пайариқ туманида туғилган Акмал Ирисов айни пайтгача Маданият вазирлигининг Иқтисодий таҳлил, молия ва бухгалтерия бошқармаси бош мутахассиси лавозимида ишлаб келган.
Шифокорлар томонидан унга ўткир нафас етишмовчилиги, икки томонлама пневмония, COVID-19 ташхислари қўйилган. 18 июль куни Акмал Ирисов вафот этган.
«Маданият вазирлиги томонидан унинг оила аъзолари ва яқинларига таъзия изҳор этиб, чуқур ҳамдардлик билдирамиз», — дейилади Маданият вазири Озодбек Назарбековнинг Telegram’даги саҳифасида эълон қилинган хабарда.
Ушбу ўлим ҳолати ҳақида Соғлиқни сақлаш вазирлиги ахборот бермади.
Учинчи ўлим. Тошкент шаҳри Шайхонтоҳур туманида яшаган 49 ёшли А.А. исмли эркакда 14 июль куни COVID-19 тасдиқланган ва Вирусология илмий текшириш институти клиникасига ётқизилган. Унга COVID-19 инфекциясининг ўта оғир кечиши, икки томонлама пневмония ташхиси қўйилган. Беморда гипертония, артериал гипертензия каби ҳамроҳ касалликлар ҳам аниқланган.
17 июль куни мутахассислар томонидан тўлиқ ҳажмда, стандарт асосида ўтказилган реанимацион чораларга қарамасдан, гипертония ва артериал гипертензия каби ҳамроҳ касалликлар фонида беморнинг аҳволи кескин оғирлашиб, ўткир юрак-қон томир ва нафас етишмовчилигининг 4-даражаси ҳамда полиорган етишмовчилигидан вафот этди.
ССВ аввалги вафот этган беморлар ҳақидаги ўлим хабарларидан фарқли равишда бу сафар беморнинг ҳаётдан кўз юмган кунига аниқлик киритди. Беморнинг вафоти бир кундан кейин эълон қилинди. Вазирлик бунгача охирги марта 30-бемор вафот этганида унинг ўлим санаси ҳақида маълумот берганди.
Тўртинчи ўлим. Гулистон туманида яшаган 69 ёшли Т.С. исмли эркакда 11 июль куни COVID-19 тасдиқланган ва Сирдарё вилоят юқумли касалликлар шифохонасининг реанимация бўлимига ётқизилган. Беморга миокард инфаркти, COVID-19 инфекцияси, икки томонлама пневмония ташхиси қўйилган.
Бундан аввал, 29 июнь куни бемор миокард инфаркти ташхиси билан Гулистон тумани марказий шифохонасида даволанган. Шунингдек, беморда гипертония касаллигининг ва семизликнинг 3-даражалари борлиги аниқланган.
Ушбу ҳамроҳ касалликлар фонида ташхис қўйилган касаллик асоратлари ҳисобига аҳволи кескин оғирлашган бемор мутахассислар томонидан тўлиқ ҳажмда, стандарт асосида ўтказилган реанимацион чораларга қарамасдан, ўткир юрак-қон томир ва нафас етишмовчилигидан вафот этган.
69 ёшли эркак коронавирус асоратларидан вафот этган Сирдарёдаги биринчи бемор бўлди.
Бешинчи ўлим. Тошкент вилоятининг Зангиота туманида яшаган 55 ёшли У.А. исмли эркак 16 июль куни Зангиота туманидаги «Назарбек» юқумли касалликлар шифохонасига ўта оғир аҳволда олиб келинган. Беморда COVID-19 инфекциясининг ўта оғир кечиши ва икки томонлама пневмониянинг ўткир респиратор дистресс синдроми, ўткир нафас ва юрак-қон томир етишмовчилиги, полиорган етишмовчилиги асоратлари кузатилган.
17 июль куни ҳамроҳ касалликлар фонида касаллик асоратлари ҳисобига аҳволи кескин оғирлашган бемор мутахассислар томонидан тўлиқ ҳажмда, стандарт асосида ўтказилган реанимацион чораларга қарамасдан, ўткир юрак-қон томир ва нафас етишмовчилигининг 4-даражаси ҳамда полиорган етишмовчилигидан вафот этган.
Ушбу ўлим ҳолати Тошкент вилоятида содир бўлганини Соғлиқни сақлаш вазирлигининг ўзи хабар бераётган бўлса-да, Тошкент вилоятидаги коронавирус асоратларидан вафот этган беморлар сони худди 17 июлдагидек 9 та турибди. Афтидан ушбу ўлим ҳолати хатолик туфайли Тошкент шаҳрига қўшиб юборилган.
Ҳозиргача Соғлиқни сақлаш вазирлиги 83 кишининг коронавирус асоратларидан вафот этганини хабар берди. «Дарё» ҳисоби бўйича коронавирусдан вафот этганлар сони 85 нафарни ташкил этмоқда. «Дарё» 15 июль куни Давлат хизматлари агентлигига таяниб, агентликнинг Навоий вилояти бошқармасининг масъул ходими Адҳамжон Деҳқоновнинг коронавирус оқибатида вафот этганини хабар қилган. Шунингдек, 18 июль куни коронавирусга чалинган Маданият вазирлиги ходими Акмал Ирисов вафот этгани маълум бўлди. Ушбу ўлим ҳолатлар ҳозирча ССВ томонидан тасдиқланмаган.
Шунингдек, таниқли режиссёр Сарвар Каримов 17 июль куни отаси коронавирус инфекциясидан вафот этгани, аммо унга ташхис қўйилмаганини маълум қилганди.
Касалликдан даволаниш
18 июль куни 124 нафар бемор коронавирусдан соғайди. Улардан- 31 нафари Тошкент шаҳридаги тиббиёт муассасаларида;
- 55 нафари Наманган вилоятида;
- 33 нафари Андижон вилоятида;
- 5 нафари Навоий вилоятида тузалди.
Ҳозирда касаллик қайд этилган жами 16186 нафар бемордан 9127 нафари соғайиб, даволаниш кўрсаткичи 56 фоизни ташкил этмоқда. Бу сўнгги уч ой (май, июнь ва июль)даги энг паст кўрсаткичдир.
Ўзбекистонда коронавирус эпидемияси сабаб соғлиқни сақлаш тизимига тушаётган юкламани бир қадар енгиллатиш мақсадида 5 июлдан бошлаб коронавирус инфекцияси аломатсиз кечаётган беморларга уй шароитида даволанишга рухсат берилган, ушбу йўналишда йўриқнома ва эслатмалар ҳам эълон қилинган.
Бироқ Соғлиқни сақлаш вазирлиги коронавирусга чалинганларга доир ахборотларида янги беморларнинг қанчасида касаллик аломатсиз (симптомсиз) кечаётганига аниқлик киритмаяпти, шу боисдан айни вақтда коронавирусдан даволанаётган беморларнинг қанчаси касалхоналарда қолаётгани, қанчаси уй шароитида даволанаётгани маълум эмас.
Соғлиқни сақлаш вазирлиги маълумотлари бўйича айни пайтда 6976 нафар бемордан 4974 нафари Тошкент шаҳрида даволанмоқда. Фарғонада 13, Хоразмда 17, Жиззахда 40, Навоийда 47, Қорақалпоғистонда 81, Бухорода 82, Қашқадарёда 89, Наманганда 106, Сурхондарёда 115, Сирдарёда 144, Самарқандда 163, Андижонда 199 ва Тошкент вилоятида 906 нафар бемор қолди.
Изоҳ (0)