Наманган вилоят юқумли касалликлар шифохонасида коронавирус инфекциясидан бутунлай тузалган 55 нафар бемор 18 июль, шанба куни уйига кузатилди. Бу ҳақда «Дарё» мухбири Азизбек Абдувалиев хабар бермоқда.
Улар орасида Наманган шаҳри, Чортоқ, Уйчи, Учқўрғон, Янгиқўрғон, Поп, Тўрақўрғон ва Чуст туманларида яшовчи фуқаролар бор.
Шунингдек, Бухоро вилоятидан келган 3 нафар бемор ҳам касалхонани тарк этди.
Тузалганларни яшаш манзилларига жўнатиш учун 6 та автобус ажратилган. Улар ҳозирда уйларига эсон-омон етказилгани айтилмоқда.
Шу тариқа, Наманган вилоятида коронавирусдан халос бўлган беморлар сони 385 кишига етди. Касалхоналарда 128 нафар бемор қолмоқда.
Эслатиб ўтамиз, Ўзбекистонда 18 июль соат 17:00 ҳолатига кўра, 172 кишида коронавирус аниқланганди. 18 июлнинг ўзида 461 кишида вирус қайд этилди.
Айни пайтда Ўзбекистонда 9003 нафар коронавирус инфекциясига чалинган фуқаро соғайган. Даволаниш кўрсаткичи 56 фоизга тенг бўлиб турибди.
Соғлиқни сақлаш вазирлиги ҳисоби бўйича мамлакатда 83 та ўлим ҳолати қайд этилган. «Дарё» ҳисоби бўйича яна 2 киши — Давлат хизматлари агентлигининг Навоий вилояти филиали ходими ва Маданият вазирлиги ходими касаллик қурбони бўлган.
Изоҳ (0)