Ўзбекистондаги баъзи мактаблар ходимларидан карантин чоралари давом этаётган ҳозирги пайтда ҳақ тўланмайдиган меҳнат таътилига чиқиш бўйича ариза ёзиш, шунингдек, номаълум муддатгача маошларининг ярмидан ихтиёрий тарзда воз кечиш сўралмоқда. Бу ҳақда «Kun.uz» хабар берди.
Халқ таълими вазирлиги матбуот котиби Лайло Рустамованинг таъкидлашича, ходимнинг асосий йиллик меҳнат таътили тугагач, унга белгиланган тартибда маош тўланиши керак.
Маълум қилинишича, Молия вазирлиги ҳамда Бандлик ва меҳнат муносабатлари вазирлигининг 2020 йил 4 майдаги қўшма хатига асосан, карантин муносабати билан ташкилотнинг иш фаолияти тўлиқ ёки қисман тўхтатилиши сабабли, шунингдек, ходимнинг лавозим мажбуриятларининг хусусиятларига ёки бошқа сабабларга кўра ўз вазифасини масофавий иш режимида, мослашувчан иш графигида ёки уйда ишлашга ўтказиш имкони бўлмаган ҳолларда унга асосий лавозим маошидан кам бўлмаган миқдорда иш ҳақи тўланишини таъминлаш белгиланган.
«Шунга кўра, карантин даврида ходимларнинг асосий йиллик меҳнат таътили даври тугагандан сўнг уларга қўшма хатда кўрсатилган тартибда иш ҳақи тўловлари амалга оширилади», — дея маълум қилган вазирлик вакили.
Юқоридаги қўшма хатда карантинга оид чоралар амал қилиш даврида бюджет ташкилотлари ходимларини ҳатто масофавий иш режимида, мослашувчан иш графигида ёки уйда ишлашга ўтказиш имконияти бўлмаган ҳолларда ҳам иш ҳақи сақланмаган ҳолда меҳнат таътилига юбормаслик ҳамда ушбу масала бўйича аввал қабул қилинган буйруқларни қайта кўриб чиқиш тавсия этилади.
Эслатиб ўтамиз, Ўзбекистонда 10 июлдан бошлаб карантин чекловларининг кучайтирилиши сабабли давлат органлари ва ташкилотларининг асосий иш фаолиятига таъсир этмаган ҳолда ходимларининг қонунчиликда белгиланган тартибда меҳнат таътилига чиқарилиши, қолган қисмининг меҳнат фаолиятининг максимал даражада масофадан ташкил этилиши белгиланган.
Изоҳ (0)