Аввалроқ соғлиқни сақлаш вазири Алишер Шодмонов коронавирус беморларини даволашда янги тактика ишлаб чиқиш учун Қорақалпоғистонга боргани ҳақида хабар берилганди.
Ташриф давомида аҳволи оғир беморларни даволаш бўйича хорижлик ва маҳаллий мутахассислар иштирокида видеоконференция ташкил этилган. Унда коронавирус билан касалланган беморларни самарали даволаш усулларини ишлаб чиққан Германиянинг етакчи тиббиёт мутахассислари аҳволи оғир беморларни самарали даволаш бўйича зарур тавсияларни берган.
Шу жумладан, Нукус шаҳридаги клиникада даволанаётган Қорақалпоғистон Республикаси Жўқорғи Кенгеси раиси Муса Ерниязов ва Тошкент шаҳрида даволанаётган Сурхондарё вилояти ҳокими Тўра Боболовнинг ҳолати ҳам таҳлил қилинган.
«Кўп қатордаги беморларимиз билан биргаликда Муса Ерниязовнинг ҳам ҳолатини таҳлил қилиб чиқдик. Бугунги кунда ҳолати ‘стабиль’, генодинамика, сатурация кўрсаткичлари ўзгаришсиз ҳолатда турибди. Мутахассисларнинг олиб борилаётган тактика тўғрилиги ҳақидаги энг муҳим фикрини эшитдик. Бутун жаҳон соғлиқни сақлаш ташкилоти тавсиялари, протоколлари, стандартлари асосида диагностика ва даволаш ишлари олиб борилаётганини улар таъкидладилар», — деди Алишер Шодмонов.
Муҳокамалар чоғида Республика шошилинч илмий-амалий марказида ётган Сурхондарё вилояти ҳокими Тўра Боболовнинг ҳолати «стабиль» деб баҳоланган.
«Нафас олиш, гемодинамика бўйича параметрлари ҳаммаси ‘стабиль’ ҳолатда эканлиги қайд этилди. Хорижлик мутахассислар бу беморимизни даволаш бўйича нималарни ўзгартириш кераклиги масалаларини муҳокама этиб, ўз тавсияларини берди. Ўйлайманки, мана шу беморларни даволашга яхши ёрдам берадиган тавсияларга эга бўлдик», — дея қўшимча қилди соғлиқни сақлаш вазири.
Аввалроқ Сурхондарё вилояти ҳокими ва Қорақалпоғистон Жўқорғи Кенгеси раиси коронавирусга чалингани ҳақида хабар берилган эди.
Маълумот учун, бугунги кунгача Қорақалпогистонда 275 нафар коронавирусга чалинган бемор аниқланган бўлиб, уларнинг 193 нафари касалликдан бутунлай фориғ бўлган ҳамда даволаниш кўрсаткичи ҳозирда 70 фоизни ташкил этмоқда. Ҳозиргача ушбу ҳудудда бир бемор вафот этган.
Изоҳ (0)