Инқирозга қарши кураш жамғармасининг 500 млн сўмдан ортиқ маблағини ўзлаштиргани Навоий СЭОМ бош шифокори ва омбор мудири қамоққа олинди

Навоий вилояти Санитария ва эпидемиология осойишталик маркази мансабдор шахслари Молия вазирлиги ҳузуридаги Инқирозга қарши курашиш жамғармаси ҳисобидан ажратилган 500 миллион сўмдан ортиқ маблағни ўзлаштиргани аниқланди. Бу ҳақда Бош прокуратура «Дарё»га маълум қилди.

Бош прокуратура ҳузуридаги Иқтисодий жиноятларга қарши кураш департаментининг Навоий вилояти бошқармаси томонидан Навоий вилоят Санитария ва эпидемиология осойишталик маркази мансабдор шахсларига ҳамда бошқаларга нисбатан Жиноят кодексининг 167-моддаси 3-қисми «а» банди (Ўзлаштириш ёки растрата йўли билан талон-торож қилиш) билан жиноят иши қўзғатилган.

«Навоий вилояти Санитария ва эпидемиология осойишталик маркази мансабдор шахсларининг асосий вазифаси мамлакатда коронавирус пандемияси сабабли карантин эълон қилинганлиги муносабати билан вилоятда санитария ва эпидемиологик осойишталикни таъминлаш бўлсада, Ўзбекистон Республикаси Президентининг 2020 йил 19 мартдаги ПФ-5969-сонли фармони асосида ташкил қилинган Молия вазирлиги ҳузуридаги Инқирозга қарши курашиш жамғармаси ҳисобидан ажратилган маблағларни мақсадсиз сарфлаган», — дейилади Бош прокуратура хабарида.

Маълум қилинишича, марказ мансабдор ва моддий жавобгар шахслари жами 509,8 миллион сўмлик товар моддий бойликларини ўзлаштириш ва растрата қилиш йўли билан талон-торож қилган.

Жиноят ишининг тергови давомида марказ омбор мудирига 27 июнь куни ва марказ бош врачига 4 июль куни Жиноят кодексининг 167-моддаси 3-қисми «а» банди, 209-моддаси 2-қисми «а» банди (Мансаб сохтакорлиги), 205-моддаси 2-қисми «а» банди (Ҳокимият ёки мансаб ваколатини суиистеъмол қилиш) билан айблов эълон қилиниб, қамоқ тарзидаги эҳтиёт чораси қўлланилган.

Ҳозирда жиноят иши доирасида ҳолатга алоқадор бошқа шахсларнинг айблилик масаласи ҳал қилинмоқда.

Шунингдек, марказнинг 7 нафар мансабдор ва моддий жавобгар шахсларнинг турар жойларида тинтувлар ўтказилганда, марказ раҳбарининг хонадонидан 6 дона кўп тармоқли даволаш ва 1 дона ташхис қўйиш ускунаси ҳамда марказнинг 2019 йил учун юритилган буйруқларни рўйхатга олиш китоби, хўжалик мудирининг хонадонидан 8 тўплам инфекцияга қарши махсус ҳимоя кийими ва 5 турдаги тиббий ҳимоя воситалари олинган.

Жиноят иши бўйича Навоий вилояти прокуратураси томонидан тергов ҳаракатлари давом эттирилмоқда.

Аввалроқ мазкур иш бўйича 222 миллион сўмдан кўп пул маблағлари ўзлаштирилгани ҳақида хабар берилганди.

Эслатиб ўтамиз, Навоий вилоятида 7 июлдан буён коронавирусга чалинган уч нафар бемор вафот этди. Вилоятда 10 июль куни 17 кишида коронавирус аниқланди, 9 июль ҳолатига кўра, вилоятда коронавирусга чалинган беморлар сони 307 кишини ташкил қилаётганди, 272 нафар бемор касалликдан тузалишга муваффақ бўлган.