Жанубий Кореяда ишлаш вақтида меҳнат таътили олиб, Ўзбекистонга қайтган, бироқ коронавирус тарқалиши сабабли иш жойига қайта олмаётган ўзбекистонликларнинг чартер рейслар орқали Жанубий Кореяга олиб кетиш ишлари кечиктирилди. Бу ҳақда Ташқи меҳнат миграцияси агентлиги хабар берди.
Таъкидланишича, Ташқи меҳнат миграцияси агентлиги ҳамда қатор давлат идоралари ҳамкорлигида 10 июнь кунидан бошлаб Жанубий Кореядан таътил учун қайтган фуқароларни мунтазам равишда мавжуд чартер рейслар орқали ташкилий тарзда жўнатилиши йўлга қўйилган.
Ҳозирги кунга қадар таътилга келган жами 105 нафар фуқаро Жанубий Кореяга жўнатилган ва уларнинг 2 нафарида коронавирус инфекцияси аниқланган.
Қайд этилишича, Ўзбекистондан борганлар орасида коронавирус аниқлангани ҳамда Ўзбекистон ҳудудидаги эпидемиологик вазият кескинлашганлиги сабабли Жанубий Кореяга ишчи визаси (Э-9 визаси) орқали кириб борувчи фуқаролардан талаб этилиши лозим бўлган тегишли ҳужжатларга ўзгартириш киритилган. Шу сабабли, 2020 йилнинг июль ойидаги чартер рейслар орқали таътилга келганларни жўнатиш вақтинчалик кечиктирилди.
Агентлик Жанубий Корея томонидан ишчи визасига эга фуқароларнинг мамлакатга кириши учун тақдим этилиши талаб қилинадиган ҳужжатлар тўғрисида қўшимча равишда маълум қилади. Қўшимча маълумот учун +998712023355 рақамига мурожаат қилиш мумкин.
Аввалроқ Жанубий Кореяда ишлаш вақтида меҳнат таътилига чиқиб, Ўзбекистонга қайтган ва коронавирус сабабли иш жойига қайта олмаётган ўзбекистонликларнинг икки гуруҳи иш жотига қайтарилгани ҳақида хабар берилганди.
Эслатиб ўтамиз, Жанубий Кореянинг Кванянг шаҳрида 34 ёшли Ўзбекистон фуқароси коронавирусга чалингани аниқланди.
Изоҳ (0)