Тошкент вилояти ҳокими Рустам Холматов коронавирус билан боғлиқ вазият юзасидан вилоят аҳолисига мурожаат йўллади. Бу ҳақда Тошкент вилояти ҳокимлиги хабар берди.
Вилоят ҳокимининг қайд этишича, коронавирус инфекциясига чалиниш ҳолатлари вилоятда сўнгги кунларда кескин ўсиб бормоқда. Хусусан, кейинги бир ҳафтада вилоятда 217 кишида мазкур хасталик аниқланган.
Маълум қилинишича, 2020 йилнинг 2 февралидан шу кунга қадар чет элдан чартер рейслари ҳамда чегара постлари орқали мамлакатга олиб келинган жами 70 мингга яқин фуқаро карантин зоналарига жойлаштирилган.
«Жумладан, айни пайтда Юқори Чирчиқ карантин полигонида 14 830 нафар фуқаро стационар шароитда тиббий кузатувга олинган. Зангиота юқумли касалликлар шифохонаси ҳамда бошқа тиббиёт муассасаларида эса жами 563 нафар фуқаро карантин муддатларини ўтамоқда. Яна 8 мингдан зиёд фуқаро уй шароитида карантинда қолмоқда», — дейилади мурожаатда.
Ҳокимнинг таъкидлашича, Тошкент вилоятида доимий рўйхатда турган фуқаролардан 966 нафарида коронавирус касаллиги тасдиқланган бўлиб, шундан 586 нафар фуқаро соғайиб, тиббий реабилитация марказларига ва яшаш манзилларига жўнатилди. Бугунги кумда вилоятдаги тиббиёт ва карантин муассасаларида 49 нафар шифокор, 836 нафар ҳамшира, 690 нафар кичик тиббий ва техник ходим, жами 1574 киши бу касалликка қарши кураш олиб бормоқда.
Маълум қилинишича, 2020 йилнинг 10 июль куни соат 00:01 дан бошлаб ҳар қандай транспорт воситаларида Нурафшон шаҳрига вилоятнинг барча ҳудудларидан кириш ва Нурафшон шаҳридан республиканинг барча ҳудудларига, шу жумладан, вилоят туман ва шаҳарларига чиқиш тўхтатилди.
Нурафшон шаҳрига кириш ва чиқишдаги чекловлар юк ташиш билан боғлиқ ҳолларга, шунингдек, Нурафшон шаҳрида доимий яшовчи (рўйхатдан ўтган) шахсларга, Нурафшон шаҳридаги маҳаллий давлат ҳокимияти органлари, ҳуқуқ-тартибот идоралари, вилоят бошқарма, идора ва ташкилотларида меҳнат қилаётган раҳбар ва ходимлар, шифокор ва ҳамширалар, давлат санитария ва эпидемиологик осойишталик маркази ходимлари ҳамда вилоят ҳокимининг алоҳида топшириғига асосан вилоят туманларига бириктирилган масъул ходимларга нисбатан татбиқ этилмайди.
Рустам Холматовнинг билдиришича, вилоятда коронавирус пандемиясининг ҳудуд иқтисодиётига салбий таъсирини юмшатиш мақсадида алоҳида штаб фаолият олиб бормоқда. Иқтисодий блок ходимлари тадбиркорлик субъектлари билан доимий мулоқот қилиб, уларни қийнаётган масалаларни ўрганиб бормоқда. Вилоятда аксарият кўнгилочар, спорт, маиший хизмат кўрсатиш муассасалари, озиқ-овқат ва буюм бозорлари фаолияти тўхтаб қолгани билан барча ишлаб чиқариш корхоналари, озиқ-овқат билан савдо қилувчи нуқталар, дорихоналар, тиббиёт масканлари фаолиятини давом эттирмоқда. Айнан шу муассасаларда фаолият юритувчи фуқароларнинг бир ҳудуддан иккинчи ҳудудга кириши ёки чиқиши учун шароитлар яратилган.
«Вилоятдаги барча ишлаб чиқарувчи — бу саноат корхоналарими, озиқ-овқат маҳсулотлари ишлаб чиқарувчи корхоналарми, иссиқхоналарми, тўқимачилик саноати корхоналарими ёки исталган бошқа маҳсулотлар ишлаб чиқарувчилар бўлишидан қатъий назар, барча тадбиркорлик субъектлари учун юк ташувчи автомашиналар вилоят ҳудудида ҳеч қандай рухсатнома ва тўсиқларсиз ҳаракат олиб бормоқда», — дейилади вилоят раҳбари мурожаатида.
Қайд этилишича, вилоят ҳокимлиги, вилоят иқтисодиёт, молия, солиқ бошқармалари ходимларидан иборат махсус гуруҳ томонидан ҳозирда коронавирус пандемиясидан азият чеккан тадбиркорлар учун солиқ таътиллари ёки имтиёзлари бериш бўйича аризалар қабул қилинмоқда.
Шунингдек, барча тижорат банклари тадбиркорларга ажратилган кредитлар бўйича тўловлар муддатларини узайтириш чораларини кўрмоқда. Бугунги кунга қадар 7142 нафар тадбиркор ва 135 минг нафардан ортиқ жисмоний шахснинг 1,49 триллион сўмлик кредит муддатлари узайтириб берилди.
«Тиббий ниқоблар, антисептик воситалар ҳам дорихоналаримизда етарли. Уларни ишлаб чиқариш учун барча ресурслар ўзимизда мавжуд, уларни тайёрлаш ва марказлашган ҳолда дорихоналар ва савдо нуқталарига етказиб беришда ҳеч қандай муаммолар бўлмайди» , — дейди ҳоким ўз мурожаатида.
Таъкидланишича, вилоятдаги 20 мингдан ортиқ фуқаро кам даромадли ва ижтимоий ҳимояга муҳтожлиги инобатга олинган ҳолда «Саховат ва кўмак» лойиҳаси ташкил этилган. Карантин даврида ижтимоий аҳволи оғирлашган, боқувчисини йўқотган, кам таъминланган ҳамда ногиронлиги мавжуд бўлган оилаларга тадбиркорлар ва фуқаролар томонидан 2,9 миллиард сўм миқдоридаги ижтимоий ёрдамлар кўрсатилди ва бу жараён бундан буён ҳам изчил давом этади.
Эслатиб ўтамиз, Президент Шавкат Мирзиёев 8 июль куни бўлиб ўтган видеоселекторда мамлакатдаги коронавирус билан боғлиқ вазиятга тўхталиб, жойларда белгиланган қоидаларга амал қилиш борасида сусткашликка йўл қўйилганини таъкидлаганди ҳамда 10 июлдан бошлаб карантин чекловлари кучайтирилиши муносабати билан вилоят раҳбарларига аҳолига мурожаат қилиш бўйича топшириқ берганди.
Шундан сўнг, Тошкент шаҳар ҳокими Жаҳонгир Ортиқхўжаев ва Қашқадарё вилояти ҳокими Зоир Мирзаев ўзлари раҳбарлик қиладиган ҳудудлар аҳолисига мурожаат қилгани ҳақида хабарлар берилганди.
Изоҳ (0)