Шавкат Мирзиёевнинг 10 июлдаги қарори билан Алишер Саъдуллаев янги ташкил этилган Президент ҳузуридаги Ёшлар ишлари агентлиги директори лавозимига тайинланди, деб хабар бермоқда Адлия вазирлиги матбуот хизмати.
Шу муносабат билан Алишер Саъдуллаев Президентнинг ёшлар, фан, таълим, соғлиқни сақлаш, маданият ва спорт масалалари бўйича маслаҳатчисининг биринчи ўринбосари лавозимидан озод этилган.
Эслатиб ўтамиз, 30 июнь куни Ўзбекистон президенти фармони билан ёшлар сиёсати соҳасидаги қонун ҳужжатларига риоя этилиши устидан давлат назоратини амалга оширувчи янги орган — Ёшлар ишлари агентлиги ташкил этилганди. Янги агентлик ташкил топганидан кейин Алишер агентлик директори бўлиши маълум қилинганди.
Маълумот учун, Алишер Саъдуллаев 1994 йил 11 июлда Жиззах вилоятида туғилган. Тошкентдаги Сингапур менежментни ривожлантириш институтини (MDIST) битирган. 2017 йил июль ойигача Result ўқув марказини бошқариб келган. 2017 йил июль ойидан 2018 йил октябрь ойигача Халқ таълими вазирининг ўринбосари лавозимида ишлаган. 2018 йил 27 октябрдан буён Ўзбекистон ёшлар иттифоқи Марказий Кенгаши раисининг биринчи ўринбосари лавозимида фаолият юритган.
Шунингдек, 2020 йил 17 январида Шавкат Мирзиёевнинг Олий Мажлис Сенати аъзоларини тайинлаш тўғрисидаги фармонни билан Алишер Саъдуллаев сенатор этиб тайинланган ва мамлакат тарихидаги энг ёш Сенат аъзосига айланганди.
Аввалроқ Молия вазирига янги ўринбосар, Давлат статистика қўмитаси раҳбарига биринчи ўринбосар тайинлангани хабар берилган эди.
Изоҳ (0)