Alisher Sa’dullayev: Prezident ishonchi — katta qarz, buni unutmasligimiz kerak

O‘zbekistonda so‘nggi yillarda Prezident bilimli, tashabbuskor, tashkilotchi, fidoyi yoshlarga mas’uliyatli rahbarlik lavozimlarini ishonib topshirmoqda.

Jumladan, Alisher Sa’dullayev ham qisqa vaqt ichida yangi marralarni zabt etdi. Dastlab, 2017-yil iyul oyidan 2018-yil oktabr oyigacha Xalq ta’limi vazirining o‘rinbosari lavozimida samarali ish olib bordi. 2018-yil 27-oktabr kuni Shavkat Mirziyoyevning Toshkent shahri Yunusobod tumaniga tashrifi davomida 24 yoshli Alisher Sa’dullayev O‘zbekiston yoshlar ittifoqi Markaziy Kengashi raisining birinchi o‘rinbosari lavozimiga tayinlandi.

Ushbu yig‘ilishda “Prezident bizga juda katta imkoniyatlar berdi, u kishi biz, yoshlarga ishondi. Ishonch esa katta qarz, buni unutmasligimiz kerak”, — degan edi A. Sa’dullayev.

Uning fikricha, Prezident yoshlar vakilini bekordan-bekorga bu lavozimga tayinlamagan — davlat rahbari bu bilan yoshlar qo‘rqmasligi va o‘z g‘oyalarini baralla aytishi kerakligini bildirmoqchi bo‘lgan.

Shavkat Mirziyoyevning 2019-yil 29-avgustdagi farmoniga binoan O‘zbekiston yoshlar ittifoqi Markaziy Kengashi raisining birinchi o‘rinbosari lavozimda ishlab kelgan Alisher Sa’dullayev shu kundan boshlab Prezidentning yoshlar, fan, ta’lim, sog‘liqni saqlash va sport masalalari bo‘yicha maslahatchisining birinchi o‘rinbosari etib tayinlandi va O‘zbekiston yoshlar ittifoqi Markaziy Kengashi raisi vazifasini vaqtincha bajarish yuklandi.

— Davlat rahbari tomonidan bu lavozimga tayinlanishim nafaqat menga, balki barcha yoshlarga berilgan yuksak ishonchdir. Bu oilamizga, sharafli kasb egasi bo‘lgan o‘qituvchi otam va mehribon onajonimga katta faxr. Shuningdek, ayni kunlarda o‘qituvchilar nufuzini oshirish uchun qilinayotgan harakatlarga mos ravishda bu tayinlov o‘qituvchi oilasiga o‘zgacha kuch bag‘ishlaydi, — deydi A.Sa’dullayev. — Davlat rahbarining yuksak ishonchi har qanday yosh halol mehnat, tinimsiz izlanish va xalqiga sadoqat bilan xizmat qilish orqali yuqori marralarga erishishi mumkinligining isbotidir.

Singapur menejmentini rivojlantirish institutini tamomlab, faoliyatini “Result” o‘quv markazi direktorligidan boshlagan yosh rahbar “Kimni qo‘lida ishlar ekanman, nima ish qilsam ekan?”, deb emas, “Men bundan-da ko‘proq ish o‘rni yaratishga qodirman, yanada izlanishim, ko‘proq mehnat qilishim kerak”, deb o‘z ustida ishlagani bois bugun uning yutuqlari bardavom. Yaratayotgan yirik loyihalari, katta rejalari amalga oshyapti.

“Prezident yoshlarni qo‘llab-quvvatlab turgan bir paytda biz ham Alisher Sa’dullayev kabi yoshlar safi kengayishini xohlaymiz. Chunki yurt ertasini ana shunday ishbilarmon, ilg‘or yoshlar yaratadi”, — deyiladi Yoshlar media markazi xabarida.