Наманган муҳандислик-технология институти ҳамда Беларусь миллий техника университети ўртасида талабалар алмашинуви, профессор-ўқитувчилар малакасини ошириш ва қисқа муддатли стажировкалар ташкил қилиш бўйича ўзаро англашув меморандуми имзоланди. Бу ҳақда «Дарё» мухбири Азизбек Абдувалиев хабар бермоқда.
Институтда хорижий олий таълим муассасаси тажрибаси ва салоҳиятидан фойдаланган ҳолда робототехника ва саноат дизайни йўналишлари бўйича «2+2» қўшма таълим дастури йўлга қўйилади. Бундан кўзланган мақсад бизнес инкубаторлар ва билимлар узатиш офисларини яратиш, инновацион марказлар фаолиятини такомиллаштиришдан иборат.
Мазкур лойиҳани шу йил август ойида амалга ошириш кўзда тутилган.
— Дастлабки ўқув йили учун 50 нафар талаба қабул қилинади. Қўшма таълим дастури асосида робототехника соҳасидаги инжинер-технологлар, саноат дизайнерлари, трикотаж маҳсулотлари билан ишловчи муҳандислар, ахборот хавфсизлиги ва рақамли тизимлар мутахассислари тайёрланади, — дейди НамМТИ илмий ишлар ва инновациялар бўйича проректори Ойбек Эргашев. — Талабалар икки йил Наманганда, яна икки йил Беларусда таҳсил олади. Бу икки томонлама диплом олиш имкониятини беради. Магистратура босқичи бир йил бўлиб, хоҳлаган давлатда таълимни давом эттириш мумкин.
Изоҳ (0)