ОАВ вакиллари учун 4 июль, шанба куни Зангиота туманида қурилаётган кўп тармоқли махсус шифохонага пресс-тур ташкил этилди. Соғлиқни сақлаш вазирлиги ва АОКА томонидан ташкил этилган тадбирда Соғлиқни сақлаш вазири Алишер Шодмонов журналистлар саволларига жавоб қайтарди. Бу ҳақда «Дарё» мухбири Миролим Исажонов хабар бермоқда.
Шодмонов ўз интервьюсида 1-сонли Республика клиник шифохонаси ёпилиши билан боғлиқ гап-сўзларга ҳам ойдинлик киритиб ўтди.
«Ижтимоий тармоқларда тарқалаётган миш-мишларнинг барчаси асоссиз. Шифохона ўз мақомида, ўз жойида тўлиқ қувватда фаолият юритяпти. Ҳамма бўлимлари белгиланган тартибда тиббий хизмат кўрсатмоқда. Унинг ёпилиши ёки бошқа жойга кўчиши бўйича бизга ҳеч қандай топшириқ бўлгани йўқ. Шифохона бундан кейин ҳам ўз йўналишида фаолиятини давом эттиради ва ҳамон вазирлик балансида юридик шахс сифатида сақланиб турибди.
1-сонли Республика клиник шифохонасида хизмат қилувчи тиббиёт ходимларининг бир қисмини Зангиота туманидаги мазкур янги муассасага ўтказамиз. Улар, албатта, ўз хоҳиши билан келишяпти», — деди Алишер Шодмонов.
Маълумот учун, шифохонада 15 йўналишда, яъни 8 терапевтик ва 7 жарроҳлик (режали, шошилинч) касалликлари бўйича даволанади. Охирги икки йилда шифохонада Россия, Жанубий Корея ва Польшадан юқори малакали олимлар таклиф қилиниб, улар билан ҳамкорликда 24 беморда 3 турдаги мураккаб операциялар амалга оширилди.
124 нафар шифокор фаолият кўрсатаётган тиббий муассаса Литванинг Каунас республика шифохонаси, Жанубий Кореянинг Йонсей университети ва Ҳиндистоннинг Меданта клиникалари билан ҳамкорлик меморандумини имзолаган.
Изоҳ (0)