Америкадаги Specialty Vehicle Engineering (SVE) янги Syclone пикапининг версиясини тақдим этди — у 760 от кучига эга V8 компрессори билан жиҳозланган. SVE муҳандисларининг таъкидлашича, бу чекланган нусхада яратилган ўрта ўлчамли дунёдаги энг тезкор пикап ҳисобланади, деб хабар беради Motor.
SVE Syclone V8 асосини — қисқа кузов ва 3,6 литрли V6 бензин моторига эга серияли GMC Cаnyon ташкил этади. Олти цилиндрли «атмосфера» мутахассислар томонидан 5,3 литрли такомиллаштирилган В8’га айлантирилган.
General Motors’нинг куч агрегати ўрнатилган пикап совитиш ва қайта ишланган ёқилғи тизими билан жиҳозланган. Шунингдек, пикапга махсус зангламайдиган пўлатдан ясалган газ чиқариш тизими ўрнатилган.
Янги версиянинг динамик тавсифи маълум қилинмаган бўлса-да, SVE Syclone V8 соатига 100 километр тезликка тўрт сониядан камроқ вақт ичида эришади. Чунки 461 кучга эга аввалги модель — 1991 йилги Syclone нусхаси — 96 километр/соатга 4,3 сонияда эришган.
SVE Syclone V8 760 от кучи ва 813 Нм айланишлар моментини ҳосил қила олади. Бу Syclone V6’га қараганда салкам 300 от кучига кўп демак. Саккиз цилиндрли Syclone 8 поғонали автомат узатмалар қутиси ёрдамида бошқарилади. Тақдим этилган моделга уч йил ёки 58 минг километр йўл босишига кафолат берилади.
Specialty Vehicle Engineering янги пикапнинг нархини маълум қилмаган, бироқ буюртмаларни қабул қилиш бошлангани таъкидланмоқда. Модель тиражи кўп бўлмайди: 50 нусха. Калифорниядан бошқа АҚШнинг ҳар қандай ҳудудида Syclone V8’ни умумий фойдаланиш йўлларида ҳайдаш мумкин.
Изоҳ (0)