Тошкент шаҳар ЙҲХББ носоз Nexia ҳайдовчиси воқеани бошқача талқин қилишга уринганини маълум қилди (видео)

Тошкент шаҳар ИИББ ЙҲХББ «Авиасозлар» деҳқон бозори ёнида «Тўхташ тақиқланади» белгиси таъсир доирасида тўхтаб турган Nexia ҳайдовчисининг бузилиб қолган машинага ҳам жарима ёзиб кетишгани ҳақидаги видеоси юзасидан расмий изоҳ берди.

Видеода ҳайдовчи машинаси бузилиб қолгани, аммо ЙПХ инспектори уни эшитишни ҳам истамай қоидабузарликни планшетга тасвирга олиб, жарима расмийлаштирганини айтиб ўтган.

Йўл ҳаракати хавфсизлиги бош бошқармасининг изоҳида эса воқеа бошқача талқин қилингани билдирилган. Бошқарма вакили 2020 йил 19 июнь куни бозор ёнида авария маёқчаларини ёқиб турган Nexia аслида носоз бўлмагани, ходим ҳамда ҳайдовчининг суҳбати бодикамерага ёзиб олинганини таъкидлаган.

Бошқарма тақдим этган видеода ҳайдовчи ва унинг шериги бозорга икки дақиқага кириб чиқиш учун тўхтагани, тезда юриб кетиши, 2 миллион сўмлик бошқа жаримаси борлигини айтган.

Ўзбекистонда йўл ҳаракати қоидаларининг бузилишига доир маъмурий жарималарни тўлашнинг биллинг тизими ишга туширилган: ЙХҲ инспекторлари ҳайдовчиларнинг йўл ҳаракати қоидаларини бузгани фактини воқеа жойида планшетларда тасвирга олиб, «Маъмурий амалиёт» комплекс автоматлаштирилган ахборот тизимига киритмоқда. Тизим асосида эса қоидабузарларнинг телефонига SMS хабарнома шаклида ва почта орқали жарима юборилмоқда.

Бундан ташқари, тўхташ тақиқланган жойларда қолдирилган машиналар ҳаракатдаги автопатруллар томонидан қайд этилиб, айрим ҳолларда бир вақтнинг ўзида ўнлаб қоидабузарларга автоматик тартибда жарималар юборилмоқда.

Тўхташ ёки тўхтаб туриш қоидаларини бузганлик учун базавий ҳисоблаш миқдорининг 3 баравари (669 минг сўм)дан 15 баравари (3 миллион 345 минг сўм)гача жарима белгиланган.