Ижтимоий тармоқларда бошқарувни йўқотган Lacetti велосипедчини уриб юборгани тасвирланган видео тарқалди. ИИВ ЙҲХББ ахборот хизматининг аниқлик киритишича, мазкур ҳодиса 15 май куни Жиззах вилояти Зомин тумани ҳудудидан ўтган 4R40 автомобиль йўлининг 22-километрида содир бўлган.
Маълумотларга кўра, ҳайдовчи Э.У. Lacetti русумли транспорт воситасини бошқараётиб, йўлнинг чап томонига тўхташ мақсадида қарама-қарши ҳаракатланган ва бошқарувни йўқотиб, велосипедда ҳаракатланиб кетаётган 32 ёшли Т.Х.ни уриб юборган. Шунингдек, йўл четида тўхтаб турган Nexia-3 ҳамда Lacetti’га урилган.
Оқибатда велосипед ҳайдовчиси 32 ёшли Т.Х. тан жароҳати олиб, шифохонага олиб кетилган.
Мазкур ҳолат юзасидан Зомин тумани ИИО ФМБ ЙҲХБ томонидан тегишли ҳужжатлар расмийлаштирилиб, кўриб чиқиш учун туман судига юборилган.
Маъмурий ишлар бўйича Зомин туман судининг қарори билан ҳайдовчи Э.У.ни Маъмурий жавобгарлик тўғрисидаги кодекснинг 133 ва 137-моддалари (Транспорт воситалари ҳайдовчиларининг йўл ҳаракати қоидаларини бузиши жабрланувчига енгил тан жароҳати ёки анча миқдорда моддий зарар етказилишига олиб келиши) билан айбдор деб топиб, етказилган зарарни қоплаш ҳамда унга нисбатан БҲМнинг 20 баравари миқдорида жарима жазоси тайинланган.
Аввалроқ Ўзбекистонда 2020 йилнинг биринчи чорагида 1229 та йўл-транспорт ҳодисаси оқибатида 376 нафар фуқаро вафот этгани тўғрисида хабар берилганди.
Изоҳ (0)