Қозоғистонда коронавирус қурбонлари сони 100 кишига, Тожикистонда эса 51 кишига етди

Қозоғистонда ўтган бир сутка ичида яна 335 кишида коронавирус аниқланди, деб хабар беради Tengrinews.

Мамлакат бўйлаб касаллар сонининг ортиши 2,2 фоизни ташкил этмоқда. Коронавирусга чалиниш бўйича янги ҳолатлар қуйидаги ҳудудларда аниқланган:

• Нур-Султон шаҳри — 59 (2 фоиз);
• Қарағанда вилояти — 37 (2,3 фоиз);
• Олмаота шаҳри — 35 (1,1 фоиз);
• Ғарбий Қозоғистон вилояти — 29 (2,9 фоиз);
• Атирау вилояти — 21 (1,6 фоиз);
• Шарқий Қозоғистон вилояти — 21 (7,6 фоиз);
• Туркистон вилояти — 20 (4,3 фоиз);
• Чимкент шаҳри — 18 (1,5 фоиз);
• Ақмўла вилояти — 15 (6,6 фоиз);
• Ақтўбе вилояти — 15 (2,7 фоиз);
• Жамбил вилояти — 15 (2,9 фоиз);
• Павлодар вилояти — 13 (3,1 фоиз);
• Олмаота вилояти — 11 (2,1 фоиз);
• Шимолий Қозоғистон вилояти — 9 (7,2 фоиз);
• Қизилўрда вилояти — 8 (1,6 фоиз);
• Костанай вилояти — 6 (2,5 фоиз);
• Манғистов вилояти — 3 (0,7 фоиз).

Бутун мамлакат бўйлаб коронавирусга чалинганлар сони 15 877 кишига етган. Ҳозирга қадар 9902 киши соғайган, 100 киши вирус қурбонига айланган. Шунингдек, 6831 киши коронавирусни белгисиз ташувчи сифатида қайд этилган.Қирғизистонда 18 июнь ҳолатига кўра, яна 95 кишида коронавирус инфекцияси аниқланди. Бу ҳақда мамлакат Соғлиқни сақлаш вазирлигига таяниб, Kloop хабар берди.

Коронавирусга чалинган янги касалларнинг 49 нафари Бишкек шаҳри ҳисобига тўғри келмоқда. Шунингдек, қуйидаги ҳудудларда ҳам коронавирус билан касалланиш бўйича янги ҳолатлар қайд этилган:

• Чуй вилояти — 14;
• Ўш шаҳри — 7;
• Ўш вилояти — 7;
• Боткен вилояти — 1;
• Талас вилояти — 4;
• Норин вилояти — 7;
• Жалолобод вилояти — 6.

Касалланиш бўйича янги қайд этилган ҳолатлар орасида 14 нафар тиббиёт ходими ҳам бор.

Бутун мамлакат бўйлаб COVID-19 билан касалланганлар сони 2657 кишига етди, уларнинг 31 нафари вирус қурбонига айланган. Ҳозирга қадар 1933 нафар бемор даволанишга муваффақ бўлган.

Афғонистонда ўтган бир сутка ичида яна 564 кишида коронавирус аниқланди, деб хабар беради Tolo News.

Мамлакат Соғлиқни сақлаш вазирлигининг маълумотларига кўра, Афғонистонда коронавирусга чалинганлар сони 26 874 кишини ташкил этмоқда.

Ўтган бир сутка давомида пойтахт Кобул шаҳрининг ўзида 192 кишида коронавирус аниқланган.

Бутун мамлакат бўйлаб коронавирус оқибатида вафот этганларнинг жами сони 504 кишига етди, ҳозирга қадар 6158 бемор даволанишга муваффақ бўлди. Ўтган бир сутканинг ўзида 650 киши соғайган, ҳозирга қадар Афғонистонда коронавирусга қарши 60,2 мингдан ортиқ тест ўтказилган.

Тожикистонда коронавирус билан касалланганлар сони 5211 кишига етди, деб хабар беради «РИА Новости». Ўтган сутка давомида яна 63 кишида коронавирус аниқланган.

Мамлакатда ўтган бир сутка ичида 61 кишига шифохонадан жавоб берилган бўлиб, ҳозирда Тожикистондаги тиббиёт муассасаларида 310 киши даволанмоқда.

Мамлакатда ҳозирга қадар 51 киши COVID-19 қурбонига айланган, 3700 бемор даволанишга муваффақ бўлган.

Ўзбекистонда 18 июнь соат 10:00 ҳолатига кўра, коронавирусга чалинганлар сони 5697 нафарга етди. Мамлакатда ҳозирга қадар 4131 нафар бемор касалликдан фориғ бўлган, 19 нафар бемор эса касаллик асоратларидан вафот этган.