Туркия ҳукумати 81 та вилоятнинг 42 тасида аҳолига жамоат жойларида тиббий ниқоб тақиб юришнинг мажбурий тартибини жорий этди. Бу ҳақда Associated Press ахборот агентлиги хабар қилган.
«Ҳудудлардаги санитар-эпидемиологик қўмиталар коронавируснинг тарқалиш хавфини камайтириш юзасидан тегишли чора-тадбирларни амалга оширишда давом этмоқда. COVID-19 билан касалланиш ҳолатлари кўпайган шаҳарларда кескин чоралар қўлланилмоқда», – деган мамлакат соғлиқни сақлаш вазири Фахриддин Кўк.
Қолган вилоятларда аҳоли жамоат транспорти, дўконлар ва савдо марказларида ниқоб тақиб юриши шарт деб белгиланган. Шунингдек, одамлар ижтимоий масофаланиш қоидаларига ҳам риоя этиши зарур.
Туркияда кафе, ресторан, спорт заллари, хиёбонлар, пляж ва музейлар қайта очилганидан кейин касалланиш ҳолатлари сони кескин ошган, шунингдек, шаҳарлараро қатновлар тақиқининг олиб ташланиши ҳам эпидемиологик вазиятнинг оғирлашишига сабаб бўлган.
Туркияда охирги кунларда 1500 дан зиёд янги касалланиш ҳолатлари қайд этилган, аввал ушбу рақам 800-900 тадан ошмай келаётганди.
Эслатиб ўтамиз, аввал Туркияда коронавирус пандемиясига қарши кўрилган чекловларнинг айримлари юмшатилган. 18 ёшдан кичик ўсмир ва ўспиринларнинг кўчага чиқишига рухсат берилган. Шунингдек, 65 ёш ва ундан катта одамларга ҳам кўчада соат 10:00 дан 20:00 гача сайр қилиш, зарурат юзасидан жамоат жойларига бориш тақиқи олиб ташланганди.
4 июнь куни Туркиянинг 10 июндан 40 та мамлакат билан авиақатновларни тиклаши, рўйхатда Ўзбекистон ҳам борлиги хабар қилинган эди.
Изоҳ (0)