Гондурас президенти Хуан Орландо Эрнандес ва унинг рафиқаси Ана Гарсия COVID-19 коронавирус инфекциясига чалингани маълум қилинди. Бу ҳақда президентнинг маҳаллий телевидение орқали қилган баёнотига таяниб, «ТАСС» хабар берган.
«Мамлакат президенти ва масъул фуқаро сифатида дам олиш кунлари давомида соғлиғимда муаммолар бўлганини айтиб ўтмоқчиман. Бугун менга коронавирусга чалинганимни хабар қилишди», – деган Эрнандес.
Шифокорлар Гондурас президенти хотиржам шароитда даволаниши лозимлигини таъкидлаган, лекин Хуан Орландо Эрнандес масофадан туриб ўз ваколатлари доирасида фаолият олиб боришда давом этади. Президент касалликнинг енгил шаклига чалингани, дорилар ичишни бошлагани ва ўзини анча яхши ҳис этаётганини айтиб ўтган.
Эрнандеснинг рафиқасида касалликнинг белгисиз шакли аниқланган. Шунингдек, президентга хизмат кўрсатадиган икки нафар ходим ҳам коронавирус билан касалланган, уларни даволаш ишлари амалга оширилмоқда.
Эслатиб ўтамиз, коронавирус билан касалланганлар сони рекорд даражада ошиб бормоқда. Дунё бўйлаб COVID-19 инфекциясига чалинганлар сони 8 миллион нафардан ошиб кетган.
Гондурасда коронавирус билан касалланиш бўйича дастлабки ҳолат 11 мартда қайд этилган. Айни кунларда мамлакатда COVID-19’га чалинганлар сони 10 минг нафардан ошган, 300 нафардан кўпроқ одам касаллик оқибатида вафот этган.
12 июнда Украина президенти Владимир Зеленскийнинг рафиқаси Елена Зеленскаяда коронавирус аниқлангани ва президент жисмоний мулоқот доирасини чеклаб мажлисларни онлайн режимда ўтказиши ҳақида хабарлар берилган. Ундан аввал 9 июнда Зеленскийнинг халқни қўллаб-қувватлаш учун коронавирус билан касалланишга ҳам рози экани таъкидлаб, бунга оила аъзолари кескин қаршилик қилганини айтганди. Шунингдек, 1 июнда Бельгия шаҳзодасининг Испанияда коронавирус юқтириб олгани маълум бўлган.
Изоҳ (0)