Россия фуқаролигини олишда Украина ва Беларусь фуқаролари учун рус тилини билишни талаб қилувчи мажбурий имтиҳонни бекор қиладиган федерал қонун кучга кирди, деб хабар беради «РБК».
Россия президенти Владимир Путин тегишли ҳужжатни 19 мартда имзолаган бўлиб, у орадан 90 кун ўтгач — 17 июнь куни кучга кирди. Украин ва беларусларга Россия фуқаролигини олиш тартибини соддалаштириш тўғрисидаги қонун лойиҳаси 2019 йилнинг охирида ИИВ ташаббуси билан тайёрланган эди.
Бунга қадар Россия фуқаролигини олиш истагида бўлганлар рус тилини билиш даражаси бўйича имтиҳон топшириши керак эди. Эндиликда ўзлари ёки тўғридан-тўғри қариндошлари Россия, СССР ёки Россия империяси ҳудудида яшаётган/яшаган, рус тилида эркин гаплаша оладиган беларус ва украинлар автоматик равишда тилни ташувчи сифатида тан олинади.
Ички ишлар вазири ўринбосари Игор Зубовнинг сўзларига кўра, рус тилини билиш даражаси комиссия акти ва миграция хизматига шахсий аризани топшириш вақтидаги аудионазорат воситаси ёрдамида қайд этилади. Бу ҳозирда Россияда бўлган 200 мингдан ортиқ украин ва беларусларнинг фуқароликни олиш жараёнларини соддалаштиради.
Ўтган олти йил давомида фуқаролик учун ариза топширган 80 мингдан ортиқ одам рус тилини ташувчи сифатида тан олинган бўлиб, уларнинг 47 минги украинлар, 800 нафари эса беларуслар ҳисобланади.
Эслатиб ўтамиз, Олий Мажлис Қонунчилик палатасининг 2020 йил февралда бўлиб ўтган навбатдаги ялпи мажлисида Ўзбекистон фуқаролигини олишда ўзбек тилини мулоқот даражасида билишни мажбурий қилиб қўйиш борасидаги таклиф муҳокама қилинган эди.
Изоҳ (0)