АҚШ Адлия вазирлиги президент Дональд Трампнинг собиқ ёрдамчиси Жон Болтонни ҳозирда нашрга тайёрлаётган китоби учун судга берди. Бу ҳақда CNN хабар бермоқда.
Вазирликнинг таъкидлашича, Болтоннинг Оқ уйдаги фаолияти ҳақидаги 500 саҳифалик қўлёзма «махфий маълумотларга бой». Америка ҳукумати ушбу маълумотни ошкор қилаётган собиқ ёрдамчи лавозимга қабул қилинганидан кейин олган мажбуриятларини бузганлигини таъкидламоқда.
Ҳукумат суддан Болтоннинг мемуарларини нашр этишни тақиқлашни талаб қилмоқда, чунки у ўз китобини шартномада кўзда тутилганидек, президент администрацияси томонидан давомли текширувдан ўтказишни рад этган.
Даъво аризасида қайд этилишича, Болтон «энг нозик ва муҳим лавозимлардан бири»га ишга қабул қилиниши арафасида АҚШ билан шартнома тузган. «Энди у бу шартномадан воз кечиб, унинг китобларини нашр этилишидан аввал текширувдан ўтказиш тугагани ҳақида бир томонлама хулоса чиқармоқда, шунингдек, мустақил равишда махфий маълумотни ошкор этиш ниятида», — дейди прокурор.
71 ёшли Жон Болтон 2018 йилнинг апрель ойидан Трампнинг миллий хавфсизлик бўйича маслаҳатчиси бўлган. 2019 йилнинг кузида у президент ташаббуси билан истеъфога чиққан. Трамп Болтоннинг бўшатилишига улар ўртасида юзага келган келишмовчилик сабаб бўлганини айтган.
2020 йилнинг январида New York Times газетаси Болтоннинг ҳали чоп этилмаган китобидан парчалар билан танишиб чиққан. Хусусан, унда айтилишича, Жон Болтон Пентагон раҳбари Марк Эспер билан бирга Украинага ҳарбий ёрдамни музлатиб қўйишни Трампга бир неча бор таклиф қилган. Бироқ Трамп Киев унга АҚШнинг собиқ вице-президенти ҳамда бўлажак сайловлардаги Демократлардан бўлган асосий рақиби Жо Байденнинг ўғли Хантер Байден борасида тергов ишларида ёрдам бермагунча буни амалга оширишдан бош тортган.
ОАВларда нашр этилувчи китобдан тезислар пайдо бўлганидан сўнг Трамп Болтон ишда кўп хатоликларга йўл қўйгани, агар унинг гапига қулоқ солганида ҳозир «олтинчи жаҳон уриши»га олиб келган бўлишини билдирган.
Изоҳ (0)