2020 йилнинг октябрь ойига бориб АҚШда коронавирус инфекцияси асоратлари оқибатида вафот этган беморлар сони 200 минг нафардан ошиши мумкин. Бу ҳақда Вашингтон университети қошидаги ўлчов ва таҳлил институтининг прогнозида маълум қилинган.
Тузиб чиқилган моделга кўра, 1 октябрга бориб АҚШда коронавирус инфекцияси оқибатида 201 минг 129 нафар киши ҳаётдан кўз юмиши мумкин.
16 июнь ҳолатига кўра Жонс Ҳопкинс университети берган маълумотларга асосан АҚШда 116,1 минг киши касаллик туфайли вафот этган. Мамлакатда касалланиш ҳолатларининг умумий сони 2,1 миллиондан ошиб кетган.
Бутун дунёда пандемия бошланганидан бери 8 миллион нафардан кўпроқ одам коронавирусга чалинган. АҚШ касалланганлар сони бўйича дунёда 1-ўринни эгаллаб турибди, кейинги поғоналарда Бразилия (888,2 минг киши) ва Россия (536 минг киши) қайд этилган.
Ўтган ҳафтада Жаҳон соғлиқни сақлаш ташкилоти раҳбари Тедрос Гебрейесус дунёда коронавируснинг тарқалиши билан боғлиқ вазиятнинг ёмонлашаётганини маълум қилганди. ЖССТ раҳбарининг айтишича, охирги декаданинг тўққиз кунида бир сутка давомида касалланганларнинг умумий сони 100 мингдан камаймаган.Эслатиб ўтамиз, 29 майда ЖССТ коронавирус инфекциясидан вафот этган беморлар сони 350 минг нафардан ошганини маълум қилган. 26 май куни бутун дунёда коронавирус инфекцияси билан касалланганлар сони 5,5 миллиондан, 21 майда 5 миллиондан, 31 майда 6 миллиондан, 8 июнь куни эса 7 миллиондан ошиб кетгани хабар қилинган.
7 июнда COVID-19’дан вафот этганлар сони дунё миқёсида 400 минг нафардан ошиб кетган.
Изоҳ (0)