Gonduras prezidenti Xuan Orlando Ernandes va uning rafiqasi Ana Garsiya COVID-19 koronavirus infeksiyasiga chalingani ma’lum qilindi. Bu haqda prezidentning mahalliy televideniye orqali qilgan bayonotiga tayanib, “TASS” xabar bergan.
“Mamlakat prezidenti va mas’ul fuqaro sifatida dam olish kunlari davomida sog‘lig‘imda muammolar bo‘lganini aytib o‘tmoqchiman. Bugun menga koronavirusga chalinganimni xabar qilishdi”, – degan Ernandes.
Shifokorlar Gonduras prezidenti xotirjam sharoitda davolanishi lozimligini ta’kidlagan, lekin Xuan Orlando Ernandes masofadan turib o‘z vakolatlari doirasida faoliyat olib borishda davom etadi. Prezident kasallikning yengil shakliga chalingani, dorilar ichishni boshlagani va o‘zini ancha yaxshi his etayotganini aytib o‘tgan.
Ernandesning rafiqasida kasallikning belgisiz shakli aniqlangan. Shuningdek, prezidentga xizmat ko‘rsatadigan ikki nafar xodim ham koronavirus bilan kasallangan, ularni davolash ishlari amalga oshirilmoqda.
Eslatib o‘tamiz, koronavirus bilan kasallanganlar soni rekord darajada oshib bormoqda. Dunyo bo‘ylab COVID-19 infeksiyasiga chalinganlar soni 8 million nafardan oshib ketgan.
Gondurasda koronavirus bilan kasallanish bo‘yicha dastlabki holat 11-martda qayd etilgan. Ayni kunlarda mamlakatda COVID-19’ga chalinganlar soni 10 ming nafardan oshgan, 300 nafardan ko‘proq odam kasallik oqibatida vafot etgan.
12-iyunda Ukraina prezidenti Vladimir Zelenskiyning rafiqasi Yelena Zelenskayada koronavirus aniqlangani va prezident jismoniy muloqot doirasini cheklab majlislarni onlayn rejimda o‘tkazishi haqida xabarlar berilgan. Undan avval 9-iyunda Zelenskiyning xalqni qo‘llab-quvvatlash uchun koronavirus bilan kasallanishga ham rozi ekani ta’kidlab, bunga oila a’zolari keskin qarshilik qilganini aytgandi. Shuningdek, 1-iyunda Belgiya shahzodasining Ispaniyada koronavirus yuqtirib olgani ma’lum bo‘lgan.
Izoh (0)