Ўзбекистонда 12 июнь соат 23:00 дан 13 июнь соат 23:00 га қадар 97 кишида коронавирусга чалиниш ҳолати қайд этилди.

Фото: Telegram / @ssvmatbuotkotibi

Янги касалланиш ҳолатлари

9 июндан бери энди коронавирусга чалинганлар сони 100 нафардан ошмади. Ўшанда 80 кишида коронавирус аниқланган. 10 июнда 103 кишида, 11 июнда 118 кишида, 12 июнда эса 128 кишида вирус қайд этилганди.

13 июнда Коронавирус инфекцияси тасдиқланган 97 беморнинг

  • 85 нафари Карантин муассасаларида;
  • 5 нафари аҳоли орасида (3 нафари Қорақалпоғистон Республикасида, 2 нафари Тошкент шаҳрида);
  • 7 нафари халқаро юк ташувчи автомашина ҳайдовчилари орасида (6 нафари Сирдарёда, 1 нафари Қорақалпоғистонда) аниқланган.

Аҳоли орасида коронавирусга чалиниш ҳолатлари аввалги кунларга нисбатан кескин камайди. Ўтаётган ҳафта давомида аҳоли орасида энг кам касалликка чалиниш ҳолати 9 июнда кузатилган бўлиб, ўша куни 25 киши коронавирус юқтириб олганди. Ҳафта давомидаги энг кўп юқтириб олиш ҳолати эса 8 июнда кузатилганди — 66 та ҳолат. Июнь ойи давомида аҳоли орасида коронавирус юқтириш ҳолатлари бунгача фақат икки марта 10 тадан кам бўлганди — 2 июнь куни 8 та, 3 июнь куни битта ҳолат. Ой давомида аҳоли орасида бир кунда 217 та ҳолатда касаллик юқтириб олиш ҳолати ҳам кузатилганди.

13 июнь куни аҳоли орасида касаллик юқтириб олиш ҳолатларининг 3 таси Қорақалпоғистонда, 2 таси Тошкентда қайд этилди. Қорақалпоғистонда июнь ойида илк марта аҳоли орасида коронавирус юқтириб олиш ҳолати қайд этилди. Ой давомида бунгача кузатилган касалланиш ҳолатлари халқаро юк машиналари ҳайдовчилари билан содир бўлаётганди.

Касалликдан даволаниш

13 июнь давомида 116 киши касалликдан соғайди. Шундан 85 нафари Тошкент шаҳридаги, 15 нафари Самарқанд вилоятидаги, 14 нафари Навоий вилоятидаги ҳамда 2 нафари Қорақалпоғистон Республикасидаги тиббиёт муассасаларида шифо топди.

Шифохоналардаги 1073 нафар беморнинг 852 нафари Тошкент шаҳрида даволанмоқда. Сирдарё ва Тошкент вилоятларидаги беморлар ҳам Тошкент шаҳрига ўтказилган.

Ҳозирда касаллик қайд этилган жами 4966 нафар бемордан 3874 нафари соғайиб, даволаниш кўрсаткичи 78 фоизни ташкил этмоқда. Бу борадаги кўрсаткич икки кундан буён 1 фоизга яхшиланмоқда.

Маълумот ўрнида, ЖиззахСурхондарё  ва Фарғона вилоятлари коронавирусдан холи ҳудуд бўлиб турибди. 13 июнь соат 21:00 ҳолатига кўра, Қорақалпоғистонда 2 нафар бемор қолганди, аммо вилоятда 4 та янги касалланиш ҳолати қайд этилди. Шундай бўлса ҳам Қорақалпоғистон энг кам бемор (6 нафар) қолган ҳудуд бўлиб турибди. Андижонда 8, Хоразмда 14, Наманганда 15, Бухорода 16 нафар бемор қолди.

Аҳволи оғир беморлар

Айни пайтда тиббиёт муассасаларида даволанаётган 1073 нафар бемордан 12 нафари оғир, 2 нафари эса ўта оғир аҳволда. Бу бир сутка ичида аҳволи оғир беморлар сони бир нафарга камайди. 13 июнда соат 10:00 ва 17:00 ҳолатига кўра, аҳволи оғир беморлар 14 нафарни, аҳволи ўта оғир беморлар 2 нафарни ташкил этаётганди.

15 мартда эпидемия бошланганидан бери Ўзбекистонда 19 нафар бемор COVID-19 асоратлари оқибатида вафот этган. Июнь ойининг ўзида 4 нафар бемор вафот этди.

Карантиндагилар

Ҳозирда Ўзбекистонда уй карантинида 26 960 нафар, стационар карантинда эса 22 497 нафар фуқаро тиббий кузатувда бўлиб турибди. Бир кун ичида уй карантинидаги фуқаролар сони 1 860 нафарга кўпайган бўлса, стационар карантиндаги фуқаролар сони 681 нафарга камайди.

Шу кунгача карантинга олинганлар ва карантиндан чиқарилганлар ҳақидаги маълумотларни ССВ матбуот котиби 12 июндан бошлаб беришни тўхтатди. Охирги марта 11 июнь куни берилган ахборотда Ўзбекистонда 458 539 нафар фуқаро карантинга олинган бўлиб, уларнинг 411 033 нафари карантиндан чиқарилгани маълум қилинганди.