O‘zbekistonda 13-iyun kuni 97 kishida koronavirus aniqlandi. Aholi orasida koronavirusga chalinish holatlari keskin kamaydi

O‘zbekistonda 12-iyun soat 23:00 dan 13-iyun soat 23:00 ga qadar 97 kishida koronavirusga chalinish holati qayd etildi.

Yangi kasallanish holatlari

9-iyundan beri endi koronavirusga chalinganlar soni 100 nafardan oshmadi. O‘shanda 80 kishida koronavirus aniqlangan. 10-iyunda 103 kishida, 11-iyunda 118 kishida, 12-iyunda esa 128 kishida virus qayd etilgandi.

13-iyunda Koronavirus infeksiyasi tasdiqlangan 97 bemorning

• 85 nafari karantin muassasalarida;
• 5 nafari aholi orasida (3 nafari Qoraqalpog‘iston Respublikasida, 2 nafari Toshkent shahrida);
• 7 nafari xalqaro yuk tashuvchi avtomashina haydovchilari orasida (6 nafari Sirdaryoda, 1 nafari Qoraqalpog‘istonda) aniqlangan.

Aholi orasida koronavirusga chalinish holatlari avvalgi kunlarga nisbatan keskin kamaydi. O‘tayotgan hafta davomida aholi orasida eng kam kasallikka chalinish holati 9-iyunda kuzatilgan bo‘lib, o‘sha kuni 25 kishi koronavirus yuqtirib olgandi. Hafta davomidagi eng ko‘p yuqtirib olish holati esa 8-iyunda kuzatilgandi — 66 ta holat. Iyun oyi davomida aholi orasida koronavirus yuqtirish holatlari bungacha faqat ikki marta 10 tadan kam bo‘lgandi — 2-iyun kuni 8 ta, 3-iyun kuni bitta holat. Oy davomida aholi orasida bir kunda 217 ta holatda kasallik yuqtirib olish holati ham kuzatilgandi.

13-iyun kuni aholi orasida kasallik yuqtirib olish holatlarining 3 tasi Qoraqalpog‘istonda, 2 tasi Toshkentda qayd etildi. Qoraqalpog‘istonda iyun oyida ilk marta aholi orasida koronavirus yuqtirib olish holati qayd etildi. Oy davomida bungacha kuzatilgan kasallanish holatlari xalqaro yuk mashinalari haydovchilari bilan sodir bo‘layotgandi.

Kasallikdan davolanish

13-iyun davomida 116 kishi kasallikdan sog‘aydi. Shundan 85 nafari Toshkent shahridagi, 15 nafari Samarqand viloyatidagi, 14 nafari Navoiy viloyatidagi hamda 2 nafari Qoraqalpog‘iston Respublikasidagi tibbiyot muassasalarida shifo topdi.

Shifoxonalardagi 1073 nafar bemorning 852 nafari Toshkent shahrida davolanmoqda. Sirdaryo va Toshkent viloyatlaridagi bemorlar ham Toshkent shahriga o‘tkazilgan.

Hozirda kasallik qayd etilgan jami 4966 nafar bemordan 3874 nafari sog‘ayib, davolanish ko‘rsatkichi 78 foizni tashkil etmoqda. Bu boradagi ko‘rsatkich ikki kundan buyon 1 foizga yaxshilanmoqda.

Ma’lumot o‘rnida, Jizzax, Surxondaryo  va Farg‘ona viloyatlari koronavirusdan xoli hudud bo‘lib turibdi. 13-iyun soat 21:00 holatiga ko‘ra, Qoraqalpog‘istonda 2 nafar bemor qolgandi, ammo viloyatda 4 ta yangi kasallanish holati qayd etildi. Shunday bo‘lsa ham Qoraqalpog‘iston eng kam bemor (6 nafar) qolgan hudud bo‘lib turibdi. Andijonda 8, Xorazmda 14, Namanganda 15, Buxoroda 16 nafar bemor qoldi.

Ahvoli og‘ir bemorlar

Ayni paytda tibbiyot muassasalarida davolanayotgan 1073 nafar bemordan 12 nafari og‘ir, 2 nafari esa o‘ta og‘ir ahvolda. Bu bir sutka ichida ahvoli og‘ir bemorlar soni bir nafarga kamaydi. 13-iyunda soat 10:00 va 17:00 holatiga ko‘ra, ahvoli og‘ir bemorlar 14 nafarni, ahvoli o‘ta og‘ir bemorlar 2 nafarni tashkil etayotgandi.

15-martda epidemiya boshlanganidan beri O‘zbekistonda 19 nafar bemor COVID-19 asoratlari oqibatida vafot etgan. Iyun oyining o‘zida 4 nafar bemor vafot etdi.

Karantindagilar

Hozirda O‘zbekistonda uy karantinida 26 960 nafar, statsionar karantinda esa 22 497 nafar fuqaro tibbiy kuzatuvda bo‘lib turibdi. Bir kun ichida uy karantinidagi fuqarolar soni 1 860 nafarga ko‘paygan bo‘lsa, statsionar karantindagi fuqarolar soni 681 nafarga kamaydi.

Shu kungacha karantinga olinganlar va karantindan chiqarilganlar haqidagi ma’lumotlarni SSV matbuot kotibi 12-iyundan boshlab berishni to‘xtatdi. Oxirgi marta 11-iyun kuni berilgan axborotda O‘zbekistonda 458 539 nafar fuqaro karantinga olingan bo‘lib, ularning 411 033 nafari karantindan chiqarilgani ma’lum qilingandi.