Эрталабки уйқудан уйғониш билан бош оғриғини ҳис қилишнинг турли сабаблари бўлиши мумкин.
Мигрень
Ер юзидаги 10-20 % одамни мигрень муаммоси қийнайди. Тонгги соат 4 дан 8 гача организмда кам миқдорда эндорфин ва энкефалин, шунингдек, қон босимини ошишига сабаб бўладиган адреналин ажралиб чиқади. Шунинг ҳисобига эрталаб бош оғриғи безовта қилиши мумкин. Мигренда, асосан, бошнинг бир тарафида ўқтин-ўқтин оғриқ, кўнгил айниши кузатилади. Оғриқ кучлилигидан ишлаш ва дам олишга лаёқат бўлмаслиги мумкин.
Нима қилиш керак?
Симптомлар тўғри келгани билан ташхис аниқ бўлиши учун неврологга мурожаат қилиш керак.
Уйқусизлик ёки чала ухлаш
Уйқу билан боғлиқ муаммо организмнинг тонгги тикланишига халақит беради, бунинг оқибатида эса бош оғриғи кузатилади. Организм тиниқиб олиши, энергияга тўла бўлиши ва саломатликда муаммолар кузатилмаслиги учун ҳам Америка миллий уйқу фонди мутахассислари кунига 7-8 соат ухлаш кераклигини таъкидлайди.
Нима қилиш керак?
Бир вақтда ётиб, бир вақтда туришга одатланинг, кундузи ухламанг. Ётоқхонангиз тинч, ортиқча шовқинларсиз, қоронғи бўлишига эътибор беринг. Бундан ташқари, қаҳвани камроқ ичишга ҳаракат қилинг.
Тушкунлик ва хавотир
Тушкунлик бош оғриғини қўзғатадиган энг асосий сабаблардан бири. Депрессияга тушган одамларда қуйидаги симптомлар кузатилади:
- ишга, атрофдаги нарсаларга қизиқишнинг йўқолиши;
- ёмон кайфият ва арзимаган нарсага асабийлашиш;
- тез чарчаш ва энергиясизлик;
- айбдорлик ҳисси ва ўтмишдаги омадсизликлардан қийналиш;
- иштаҳа ва вазн одатдагидан кўпайиши ёки камайиши.
Узоқ вақт тушкунликда юриш нафақат ўзингизнинг, балки атрофдагиларнинг руҳияти ва саломатлигига салбий таъсир қилади. Муаммо жиддий эканини сезишингиз билан психотерапевтга мурожаат қилинг.
Спиртли ичимликлар
Спиртли ичимликлар одамни агрессив қилиб қўяди, унинг саломатликка зарари ҳақида-ку гапирмаса ҳам бўлади.
Нима қилиш керак?
Агар муаммо спиртли ичимлик билан боғлиқ бўлса, ечими оддий — ичманг!
Кофеин етишмаслиги синдроми
Қаҳвага қарам инсон тўсатдан қаҳва ичмай қолганида мазкур синдром кузатилади. Қаҳва таркибидаги кофеин мияга таъсир қилади, уни истеъмол қилишдан тўхташ эса бош оғриғига сабабчи бўлиши мумкин.
Нима қилиш керак?
Қаҳва ичишни буткул бас қила олмасангиз, ичиш миқдорини камайтиринг. Кунига 5 финжон ичиш одатингиз бўлса, бир ҳафта 4, кейинги ҳафта 3 финжон ичинг.
Изоҳ (0)