Миланда жойлашган касалхоналардан бирининг шифокорлари Европада биринчи бўлиб COVID-19’дан даволанган беморга ўпка кўчириб ўтказди, деб хабар беради «РБК».
Ўпкани кўчириб ўтказиш бўйича операция 10 кун олдин амалга оширилган. Ҳозирда 18 ёшли беморнинг аҳволи яхши. Бемор касалхонага олиб келингунига қадар ҳеч қандай сурункали касалликлардан азият чекмаган, бироқ COVID-19 коронавирус инфекциясига чалингач, у икки ой Сан-Рафаэлдаги госпитал реанимациясида ётган. Бу вақт давомида бемор сунъий нафас олдириш аппаратига улаб қўйилган, чунки касаллик унинг ўпкаларини деярли ишдан чиқарган. Шифокорлар беморнинг ҳаётини трансплантация орқали сақлаб қолишга қарор қилган.
Ўпкани кўчириб ўтказиш — мураккаб операция. Мазкур ҳолатда эса коронавирусга чалинган бемор устида операция ўтказиш янада қийинчилик туғдирган. Операциядан олдин бемор коронавирус инфекциясидан даволаниш курсидан ўтган. Вирусдан буткул соғайгач, шифокорлар донор қидира бошлаган.
Ўпкани кўчириб ўтказиш операциясини шифокорлардан иборат иккита бригада тўққиз соат давомида амалга оширган. Шифокорлар касалликдан ҳимояланиш мақсадида ниқоб, ҳимоя шлемлари ва икки қават қўлқоп тақишга мажбур бўлган. Бу эса жарроҳларга қўшимча қийинчилик туғдирган, бироқ операция муваффақиятли якунланган. Ҳозирда бемор мустақил нафас олишни қайта тиклаш бўйича физиотерапия олмоқда.
Изоҳ (0)