Россиялик блогерлар 30 йил олдин ишлаб чиқарилган BMW’ни қайта тиклаб, 1 рубль эвазига сотиб юбормоқчи (видео)

YouTube’даги «ПриветТачка» канали муаллифлари омборда ётган 1989 йилги E34 кузовидаги BMW’ни сотиб олиб, қайта тамирлади.

Мазкур автомобилнинг олд тарафдаги йўловчи ўриндиғидан бошқа барча ўриндиқлари йўқ бўлган; қурилмалар панелини эса блогерлар бир тортишда суғуриб олган; спидометр кўрсаткичи ҳаракатсиз бўлган. Шунга қарамай, автомобилнинг электроникаси ва двигатели ишлайверган. Машинага 188 от кучига эга ва 8,5 сонияда 100 км/соат тезликка эришиш имконини берадиган 3,0 литрли V6 бензин двигатели ўрнатилган.

Блогерлар моделни қайта тиклаш учун япон кимошди савдосидан AC Schnitzer ғилдирак дискаларини, эшик, BMW 7-серияга тегишли тўлиқ чарм салон ва янги оптикаларни сотиб олган. Узоқ давом этган меҳнатдан сўнг автомобиль ўзининг аввалги ҳолига қайтган. Лойиҳа муаллифлари ушбу машинага яна озгина ишлов бериб, уни бир рубль эвазига сотиб юборишни режалаштирмоқда.

E34 кузовидаги BMW 5-серия 1988 йилдан 1996 йилга қадар ишлаб чиқарилган бўлиб, немис концернининг афсонавий моделларидан ҳисобланади. Бу турдаги моделдан 1,3 миллион нусха ишлаб чиқарилган.