Tesla Cybertruck пикапининг анонси ва унинг ўлчамлари (5,9 х 2,03 х 1,9 метр) ҳақида маълумотлар эълон қилингач, кўплаб мунозаралар юзага келди. Маълум бўлишича, Америкадаги автомобилларга мўлжалланган аксарият гаражларга бу машина сиғмайди. Шу сабабли ушбу моделни бироз кичрайтириш таклиф этилди, деб хабар беради IXBT.
Илон Маск ушбу таклифга ижобий ёндашиб, серияли Cybertruck’нинг ўлчамлари прототипига нисбатан 3 фоизга ихчамроқ бўлишини билдирди. Бироқ автомобиль гаражга сиғиши учун унинг ўлчамлари 3 фоизга эмас, 5 фоизга кичрайтирилиши керак. Аммо кейинроқ Илон Маск пикап ўлчамларини кичрайтириш умуман кўриб чиқилмаётганини маълум қилган.
Маск ўзининг Twitter’даги саҳифасига Tesla бош дизайнери Франц Фон Хольцхаузен билан Cybertruck дизайнини яна бир бор кўриб чиққанини ёзган: «Ҳатто 3 фоизга кичрайтирилса ҳам, бу жуда кам. Деярли олдингидек ўлчам қолаверади. Балки, қачонлардир кичкина, енгилроқ машина яратармиз».
Aудиториянинг талабига қарамай, Cybertruck моделининг ўлчамларига ўзгартириш киритилмайди. Маскнинг ёзишича, Tesla’да Cybertruck light шартли номга эга янги лойиҳа иш бошлаши мумкин. Агарда бу амалга ошса, мазкур модель ўзидан олдинги моделнинг динамик тавсифларини сақлаб қолиб, арзонроқ нархда сотувга чиқади. Моделга бўлган талаб дастлабки Cybertruck’дан ҳам кўпроқ бўлиши мумкин.
Изоҳ (0)