Жаҳон соғлиқни сақлаш ташкилоти (ЖССТ) коронавируснинг келиб чиқишини ўрганиш учун Хитойга миссия юборишни режалаштирмоқда. Бу ҳақда ЖССТнинг фавқулодда вазиятлар дастури раҳбари Майк Райан брифингда маълум қилди.
«Биз хитойлик ҳамкасбларимиз билан муҳокамалар жараёнида турибмиз. Тушунишим бўйича, илмий миссиянинг аниқ санаси ҳозирча маълум эмас», — деган Райан. Шунингдек, ташкилот бундай миссияни ўтказишда турли хил мамлакатларнинг илмий вакиллари иштирок этиши имконияти тезроқ пайдо бўлишини кутаётганини таъкидлаган.
Райаннинг айтишича, бундан кўзланган мақсад вируснинг келиб чиқишини аниқлашдир. Хитой бундай ёндашувга тайёр эканлигини билдирганини қўшимча қилган.
Ўз навбатида, ЖССТ Бош директори Тедрос Адан Гебрейесус ҳам бундай тадқиқотни ўтказишдан барча томонлар манфаатдор эканлигини таъкидлаган. «Чунки, шу тариқа, вируснинг келиб чиқишини ўрганиш орқали келажакда унинг пайдо бўлишининг олдини олишимиз мумкин», — деган у.
Эслатиб ўтамиз, май ойи бошларида Хитой ҳукумати расмийлари коронавирус инфекцияси келиб чиқиши бўйича текширувни бошлаган, бироқ ЖССТ мутахассислари унда иштирок этиш учун таклиф қилмаган эди.
АҚШнинг Fox News телеканали коронавируснинг Уханда лаборатория шароитида яратилганини тахмин қилган. Дональд Трамп ҳам коронавирус лабораторияда яратилганини исботловчи далиллари борлигини билдирган. АҚШ давлат котиби Майкл Помпео Хитой касаллик тарқалиши юзасидан муҳим ахборотга эга бўлгани, аммо уни ўз вақтида ошкор қилмаганини айтган.
Бунга жавобан ЖССТ АҚШ коронавирус лабораторияда яратилгани тўғрисида ҳеч қандай маълумот тақдим этмаганини, коронавирус Хитой лабораторияларида пайдо бўлгани тўғрисидаги баёнотни спекулятив деб айтган.
Австралиянинг The Daily Telegraph нашри АҚШ, Буюк Британия, Канада, Австралия ва Янги Зеландия махсус хизматларини бирлаштирувчи «Беш кўз» разведка альянси томонидан тайёрланган 15 варақли ҳисоботга таяниб, Хитой COVID-19 коронавирус инфекциясига оид далилларни қасддан йўқ қилиб юборганини ёзганди.
The Guardian ғарб махсус хизматларида Хитой коронавирус ҳақидаги маълумотларни яширганлигига оид далиллар йўқлигини, Австралия газетадаги маълумотлар «Беш кўз» разведка альянсидан эмас, АҚШнинг ўзидан келганини билдирган.
Американинг The Washington Post газетаси эса коронавирусга чалиниш бўйича дастлабки ҳолат ҳақида яна турли назариялар тарқалишининг олдини олиш мақсадида Хитой ҳукуматини биринчи одам касалланиши тўғрисидаги маълумотларни ошкор қилишга чақирган.
Изоҳ (0)