Макао казино бизнеси қироли, миллиардер Стэнли Хо вафот этди

Осиёдаги энг йирик ўйин компанияларидан бирининг асосчиси, миллиардер Стэнли Хо 98 ёшида вафот этди, деб хабар беради Reuters.

Стэнли Хо — ўйин бизнесидаги энг даромадли компаниялардан бири ҳисобланувчи SJM Holdings асосчиси ҳисобланади. У Макаодаги йирик казинолар тармоғини бошқарган. Компания олти миллиард долларга баҳоланган.

Стэнли Хо 1921 йили Гонконгда ўзига тўқ оилада дунёга келган, бироқ у ўсмирлик ёшига етганида оиласи хонавайрон бўлган. 1941 йили Япония Гонконгга бостириб киргач, Хо Макаога қочган ва шу ердан Хитойга ўзининг биринчи контрабанда товарларини муваффақиятли жўнатган. Бизнесмен ва Британия Гонконги филантропи Роберт Хотхундан у «Макао қироли» лақабини олган.

1962 йили Стэнли Хо инвесторлар гуруҳи билан Макаода 2001 йилга қадар барча ўйин операцияларини бошқариш ҳуқуқини қўлга киритган компанияга асос солган. SJM Holdings Макаони энг йирик ўйин марказига айлантириб юборган. Ҳозирда Хонинг оиласига қарашли компанияларга минтақадаги олтита ўйин лицензияларининг учтаси тегишли.

2018 йилда Стэнли Хо SJM Holdings раҳбарлигидан кетиб, ўз бизнес-империясини оиласининг турли аъзоларига бўлиб берган — унинг тўртта хотинидан 17 нафар фарзанди бор.