Коронавирусга қарши кураш доирасида қатъий чекловларни жорий этишдан бош тортганига қарамай, Швеция кенг кўламли иқтисодий инқирозга ва ишсизлик даражасининг ошишига дуч келди, деб ёзмоқда Bloomberg.
Швециянинг статистик маълумотларига кўра, апрель ойида мамлакатда ишсизлик прогноз қилинганидан ҳам ошиб, 7,9 фоизга кўтарилди.
Мавсумий омилларни ҳисобга олмаганда, кўрсаткич 8,2 фоизни ташкил этади. Аммо агентлик таҳлилчиси Йоханн Йенссоннинг сўзларига кўра, агар товарлар ва хизматларга бўлган талаб тикланмаса, ишсизлик даражаси 17 фоизгача кўтарилиши мумкин.
Ишсизлик ортиб бораётган бир пайтда ҳукумат иш берувчиларни ишдан бўшатишни осонлаштирадиган ва арзонлаштирадиган қонун лойиҳасини муҳокама қилмоқда. Бундай таклиф касаба уюшмалари ва мухолифат томонидан танқидга учраган. Агар бундай тузатишлар қабул қилинса, мухолифат етакчилари мамлакат бош вазири Стефан Левенга ишончсизлик вотумини эълон қилиш билан таҳдид қилди.
Бир ҳафта аввал Bloomberg Швеция Иккинчи Жаҳон урушидан буён энг ёмон иқтисодий таназзулга юз тутиши мумкинлиги ҳақида хабар берган эди. Мамлакат молия вазири Магдалена Андерссоннинг сўзларига кўра, Швеция иқтисодиёти 2020 йилда 7 фоизга пасаяди.
Коронавирус эпидемиясига қарши курашда Швеция ҳукумати мамлакатда қатъий чекловлар қўйишни рад этиб, ностандарт ёндашувни танлади. Жамоат жойлари, кафелар, бошланғич мактаблар ва болалар боғчалари очиқлигича қолди. Фақат 50 кишидан ортиқ одам йиғилишига тақиқ қўйилди холос. Аҳолига ижтимоий масофа сақлаш, имкон қадар уйдан туриб ишлаш ва кексалар билан яқиндан туриб мулоқотда бўлмаслик тавсия этилган.
Жонс Ҳопкинс маълумотларига кўра, Швецияда коронавирусга чалинганлар сони 33,8 минг кишидан ошган. Касаллик қурбонлари сони эса 4 минг кишидан ортиқ.
Изоҳ (0)