Шавкат Мирзиёев Андижон вилоятига сафари чоғида «Замонавий қишлоқ» лойиҳаси тақдимоти билан ҳам танишди. Бу ҳақда Президент матбуот хизмати хабар қилган.
Пахтаобод тумани Бўстонобод қишлоғи ҳамда Қўрғонтепа тумани «Янги ҳаёт» маҳалласи учун ишлаб чиқилган дастлабки режага мувофиқ, қишлоқ ҳудудларга зарур муҳандислик коммуникациялари тортилиб, кўп қаватли уйлар қурилади. Улар, аввало, бир уйда кўпчилик бўлиб яшаётган оилалар, шунингдек, аҳолининг муҳтож қатламига берилади.
Шавкат Мирзиёев бу борада Андижон тажрибасини яратиш кераклигини таъкидлади. Бунинг учун алоҳида лойиҳа ишлаб чиқиш, «Замонавий қишлоқ»даги уйларни бошқа турар жойларга нисбатан арзон қилиш бўйича кўрсатмалар берди.
Шунингдек, вилоятда камбағалликни қисқартириш, ипотека кредитлари асосида якка тартибдаги уйларни қуриш-таъмирлаш лойиҳалари муҳокама қилинди.
Аввал Шавкат Мирзиёев Андижон вилоятига ташрифи доирасида дастлаб Олтинкўл туманидаги «Кўҳна водий баҳори» фермер хўжалигида бўлиб, ғалла ва ғўза ривожини кўздан кечиргани ва ғўза қатор ораларига соя экиш бўйича топшириқ бергани, шунингдек, Президентнинг Андижонда йилига 11 миллион дона тайёр маҳсулот ишлаб чиқарадиган янги тўқимачилик корхонаси ҳамда Андижон шаҳрида қурилган 7 ва 16 қаватли янги уйларни бориб кўргани ҳақида хабарлар берилган.
Изоҳ (0)