Тошкент вилоятидаги шаҳар ва туманлар мазкур ҳудудлардаги эпидемиологик вазиятга боғлиқ равишда «қизил», «сариқ» ва «яшил» ҳудудларга ажратилди. Бу ҳақда вилоят ҳокимлиги хабар берди.
Маълум қилинишича, охирги 14 кун ичида коронавирус инфекциясига чалинган шахслар аниқланган Янгийўл шаҳри ҳамда Оққўрғон, Зангиота ва Паркент туманлари «қизил» ҳудудлар қаторига кирган.
Охирги 14 кун давомида коронавирус инфекциясига чалинган шахслар аниқланмаган, бироқ ушбу касалликка чалинган ва даволанаётган шахслар мавжуд бўлган Ангрен шаҳри, Чирчиқ шаҳри, Бекобод тумани, Қибрай тумани, Қуйи Чирчиқ тумани, Ўрта Чирчиқ тумани, Чиноз тумани, Юқори Чирчиқ тумани, Тошкент тумани айни пайтда «сариқ» ҳудудлар ҳисобланади.
«Яшил» ҳудудлар, яъни коронавирус инфекциясига чалинган шахслар аниқланмаган ёки аниқланган шахслар тўлиқ соғайган ҳудудлар қаторидан Олмалиқ шаҳри, Оҳангарон шаҳри, Бекобод шаҳри, Нурафшон шаҳри, Оҳангарон тумани, Бўстонлиқ тумани, Бўка тумани, Пискент тумани ўрин олган.
Эслатиб ўтамиз, Республика махсус комиссиясининг 2020 йил 6 майдаги йиғилиши баёнига мувофиқ, коронавирус тарқалиши ҳолатининг ҳудудлар кесимидаги таҳлилидан келиб чиқиб, мамлакат «қизил», «сариқ» ва «яшил» ҳудудларга ажратилди. Унга кўра, Қорақалпоғистон Республикаси, Андижон, Наманган, Фарғона, Самарқанд, Тошкент, Бухоро ва Сирдарё вилоятлари «қизил» ҳудудлар ҳисобланади. Сурхондарё, Хоразм вилоятлари, Тошкент шаҳри «сариқ» ҳудудлар бўлиб турибди. Навоий, Жиззах ва Қашқадарё вилоятлари эса «яшил» ҳудудлар қаторини ташкил қилмоқда.
Президент Шавкат Мирзиёев 7 май куни ўтказилган видеоселектор йиғилишида ҳар бир вилоят ҳудудидаги туман ва шаҳарларни ҳам ана шу тоифага ажратиш кераклигини айтганди. Унга кўра, «яшил» вилоятдаги бирор-бир туманда касаллик аниқланадиган бўлса, бутун вилоятнинг тоифаси ўзгартирилмайди.
Изоҳ (0)