Андижон шаҳрининг Оқровот маҳалласи, 1-тор Шаҳидтепа кўчасида яшовчи фуқаролар электр таъминотидаги муаммолари олти йилдан буён эътиборсиз қолаётганидан шикоят қилди.
«Дарё» мухбири Умиджон Мамарасулов воқеа тафсилотларини ўрганиш мақсадида ҳудудда бўлди.
Маҳалла фаолларининг айтишича, электр таъминотидаги муаммолар юзасидан 2014 йил вилоят ҳокимлигига мурожаат қилинган. Ҳокимлик мурожаатга жавобан ҳудуддаги муаммо 2017 йилги давлат дастури асосида ечимини топишини, янги тармоқ тортилишини ёзган. Бироқ шу кунга қадар ҳеч қандай ишлар қилинмаган.
«2014 йилда вилоят ҳокимлигига хат юборганмиз. Ҳокимлик муаммони ижобий ҳал қилиш учун вилоят электр тармоқлари корхонасига жўнатган. Ундан Андижон шаҳар ‘Бобур’ электр таъминоти корхонасига жўнатилган. Корхона раҳбарияти ўшанда бизга уч йилдан кейин дастурга қўйишини айтганди. Мана 2019 йилгача кутдик. Бу орада уларга бир неча маротаба эслатдик ҳам. Лекин ҳеч қандай натижа бўлмади. Одатдагидек ваъда беришдан нарига ўтишмаяпти», — дейди Холмуҳаммад Якубов.
Маҳалла аҳлининг айтишича, аҳоли ҳам масъулларга ёрдам бериш мақсадида 17 миллион сўм пул йиғиб, трансформатор сотиб олган.
«Ўтган йилнинг ёзларида ‘электрасет’га шахсан ўзим бордим. Ўша пайтдаги корхона бошлиғи Жўрабек исмли йигит экан. У вазиятни тушуниб ҳал қилишини айтди. Фақат трансформаторни ўзларингиз оласизлар, биз қолган ‘столба’ ва симларни давлат ҳисобидан қиламиз’, деди. Шундан кейин қўни-қўшнилар билан маслаҳатлашиб, 17 миллион сўм пул йиғдик ва трансформатор олиб, ўрнатиб қўйдик. Лекин ‘электрасет’дагилардан дарак бўлмади. Борсак, турли баҳоналар билан ортга қайтаришади. Натижа йўқ», — дейди Холмуҳаммад Якубов.
Шаҳидтепа кўчасида яшовчи фуқароларнинг айтишича, ушбу кўчада қад ростлаган симёғочлар 29 йил илгари ўрнатилган бўлиб, айни кунда яроқсиз ҳолга келган.
«Шу кўчада деярли 30 йилдан бери яшайман. Кўчадаги симёғочлар бундан 29 йил илгари ўрнатилган. Электр симлар ҳам ўша даврда уланган. Ўша пайтда хонадонлар ва аҳоли сони анчагина кам эди. Йиллар давомида аҳоли кўпайиб, эҳтиёж ортмоқда. Нариги кўчага ўрнатилган трансформатор катта босим билан ишлаяпти. Шунингдек, маҳаллада газ йўқлиги сабаб барча эҳтиёж ток орқали қондирилиши эвазига ‘свет’имиз кўп ўчадиган, трансформатор эса тез-тез бузиладиган бўлиб қолди. Одамлар шунақа ҳолатлардан чарчади. Агар кўчамизга трансформатор ўрнатилса, 70 дан ортиқ хонадон муаммосиз яшайди» — дейди шу кўчада яшовчи фуқаролардан яна бири Икром Асқаров.
Маҳалла фаоли Дилмурод Эргашевнинг айтишича, электр таъминотидагилар 2020 йил бошида янги тармоқни ўрнатиб беришга ваъда берган. Бироқ янги йил кириб келганига уч ойдан ортиқ вақт ўтган бўлса-да, ваъда ҳалигача бажарилмаган.
«2019 йил ноябрь ойининг охири декабрнинг бошида ‘электрасет’га борганимизда, улар ‘Конституция байрами, сайлов вақти келяпти, трансформаторни янги йилга ёқиб берамиз’, дейишди. Тўғриси, ҳаммамиз хурсанд бўлгандик. Афсуски, ‘чучварани хом санаган эканмиз’. Байрамдан кейин мана уч ой ўтди. Лекин натижа бўлмади. Уларга бўлган ишончимиз ҳам сўнди. Бунақа ташкилотнинг боридан йўғи яхши, дегинг келади гоҳида. Энди бир-биримиздан хафа бўлишга ҳаққимиз йўқ. Бу ёқда 70 та хонадон ‘свет’ яхшиланишини кутяпти», — дейди Дилмурод Эргашев.
Фуқаро Ўринбой Абдуллажоновга кўра, куз ойида электр таъминотидагилар кўчага етти дона симёғоч ўрнатиб кетган. Ўрнатилган симёғочларнинг айримлари ёғингарчилик натижасида яроқсиз ҳолга келган. Кучли шамол бўлса, қулаб тушиши ҳам мумкин.
«Ўтган йили масъуллар ёнига қайта-қайта бораверганимиз учун номига етти дона ‘столба’ ўрнатиб кетишди. Ўшанда трансформаторни биргаликда ўрнатганмиз. ‘Келинглар, бирданига якунига етказиб беринглар’ деганимизда, баҳона қилиб қочишган. Аслида ўрнатилган ‘столба’лар аҳоли сонига нисбатан жуда кам. Яна 10-15 та ‘столба’ бўлса, шунда оралиқ масофа 50 метрдан тўғри келади. Лекин масъуллар алдашда давом этишмоқда. Биз уларга ишониб, олти йилдан бери кутяпмиз», — дейди Ўринбой Абдуллажонов.
Маълум бўлишича, Андижон шаҳар «Бобур» электр тармоқлари корхонаси 20 832 та истеъмолчига хизмат кўрсатади. Корхонада 100 нафарга яқин ходим фаолият юритади.
Жорий йил 9 март куни «Дарё» мухбири билан суҳбатлашган корхона ишлаб чиқариш ва техника бўлими муҳандиси Бобуржон Абдукаримов мутахассислар қиш мавсумида юқори босим остида, зўриқиш билан ишлаган трансформаторларни тузатиш ва янгилаш билан банд бўлганини айтиб, вақт ва куч етмаганини таъкидлаганди. Ҳамда март ойи охирига трансформаторни ўрнатиб беришга ваъда берган. Шундан сўнг, мурожаатчилар журналистдан мақолани эълон қилмай туришни сўраган.
«Мана икки ойдирки, берилган ваъда қуруқ гаплигича қолди. Масъуллар айтган гапидан қайтди», — дейди Холмуҳаммад Якубов.
Изоҳ (0)